ეპისკოპოსი იაკოპი ე.წ. ციანიდის საქმეზე მსჯავრდებულ, დეკანოზ გიორგი მამაალაძის შეწყალების საქმეს, ქადაგების დროს გამოეხმაურა და მას "ავაზაკი" უწოდა. იაკობმა დეკანოზი "დაჯგუფებუს წევრადაც" მოიხსენია:

"პატრიარქის მოცილება ვისაც უნდოდა, იმ დაჯგუფების ერთ-ერთ წევრს, აცხადებენ ლამის გმირად და ლამის მოწამედ".

ბოდბელმა ეპისკოპოსმა განაცხადა, რომ იგი დეკანოზის შეწყალების მოწინააღმდეგე არ არის, თუმცა მისივე თქმით, თუ ეს მოხდება, ის ყველას ამხელს და იტყვის თუ "რას აპირებდნენ და რას არ აპირებდნენ".

"თითქმის ორი წელია მაგათ ავაზაკობას ვითმენ, ვუსმენ... დაგვაცადონ, ჩავატარებთ სინოდს და ყველა ვნახავთ, ვინ არის ეკლესიის მტერი, ჩვენი სამშობლოს მტერი და ვინ არის მოყვარე. გამოუშვან [დეკანოზი გიორგი მამალაძე], მაგაზე პირადად მე არანაირი პრობლემა არ მაქვს, მაგრამ რასაც ვითმენდი, სანამ ციხეში იყო და როგორც მლანძღავდნენ, რომ თითქოს მე დავაჭერინე... მე შევუკვეთე ციანიდი? მაგათ რა ჰგონიათ, არ ვიტყვი, რას აპირებდნენ და რას არ აპირებდნენ? სხვებზეც არ ვიტყვი უნდოდათ თუ არა პატრიარქის მოცილება? იმიტომ მებრძვიან, რომ არ დავანებე და მაგას ყველას დავუმტკიცებ", - განაცხადა ეპისკოპოსმა იაკობმა.

9 აგვისტოს დეკანოზ გიორგი მამალაძის ადვოკატებმა პრეზიდენტს, გიორგი მარგველაშვილს მათი დაცვის ქვეშ მყოფის შეწყალების თხოვნით მიმართეს. ადვოკატების განცხადებით, მიუხედავად შეწყალების თხოვნისა, დეკანოზი თავს უდანაშაულოდ სცნობს.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა. 2018 წლის 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.

მამალაძე 2017 წლის 10 თებერვალს თბილისის საერთაშორისო აეროპორტში დააკავეს. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად.

გაიგეთ მეტი: ციანიდის საქმე - მოკლედ