"პრეზიდენტი არსად ჩანს" - თრილერი, რომელიც ბილ კლინტონმა თანაავტორ ჯეიმს პატერსონთან ერთად დაწერა, მხოლოდ ჩრდილოეთ ამერიკაში ერთ მილიონზე მეტი ტირაჟით გაიყიდა. ეს ბილ კლინტონისთვის პირველი მხატვრული წიგნია, თუმცა ასეთი შედეგი გასაკვირი არაა. პატერსონის სახით მას ერთ-ერთი ყველაზე წარმატებული მწერალი ჰყავდა პარტნიორად. რომანი 4 ივნისს გამოიცა.

რეცენზიები ერთმანეთისგან რადიკალურად განსხვავდება. როგორც Barnes & Nobles-ის მიმომხილველი ამბობს, წიგნის წარმატება, ერთი მხრივ, არამხატვრული პროზის მზარდ ტალღაში მხატვრული რომანების ნაკლებობამ განაპირობა, მეორე მხრივ კი - ყოფილი პრეზიდენტის სანაცნობო წრემ, რომელმაც ძალა არ დაიშურა წიგნის პოპულარიზაციისათვის.

აღსანიშნავია, რომ წიგნი აშშ-ზე განხორციელებულ კიბერშეტევებს ეხმიანება, ამ პრობლემას კი ქვეყნის უშიშროების ექსპერტებმა მთავარი საფრთხე უწოდეს. სახელმწიფო დაზვერვის სამსახურის დირექტორმა დენ ქოუთსმა ივლისში განაცხადა, რომ "რუსეთი კიბერშეტევის კუთხით უდავოდ ყველაზე აგრესიული მოთამაშეა".

კლინტონის წინა წიგნი - მემუარები "ჩემი ცხოვრება" 2004 წელს გამოიცა და სულ მისი 2 250 000 ეგზემპლარი გაიყიდა. ასე რომ, ბილ კლინტონი ის იშვიათი გამონაკლისია, რომელმაც შეძლო და როგორც მხატვრულ, ისე არამხატვრულ ლიტერატურაში გადააბიჯა მილიონიან ზღვარს.