დღეს, 27 ივლისს, Summer Set-ის ფესტივალი განახლებულ ტერიტორიაზე დაიწყება. თავდაპირველად ფესტივალი თბილისის ზღვის ღია სივრცეში უნდა გამართულიყო, თუმცა ქართველი სინპტიკოსების ცნობით, 27 ივლისს დღის მეორე ნახევრიდან მოსალოდნელია წვიმა, რის გამოც ფესტივალის ლოკაცია შეიცვალა.

ახალი სივრცე ცოტნე დადიანის 32 ნომერში, ელექტროვაგონშემკეთებლი ქარხნის ყველაზე დიდი პავილიონი მდებარეობს. ტერიტორიას გააჩნია როგორ დახურული, ასევე ღია სივრცე და მზადაა 10 000 სტუმარს უმასპინძლოს.

ფესტივალის დაწყების დრო და არტისტების გამოსვლის ქრონოლოგია არ შეცვლილა. Summer Set 19:00 სთ-ზე დაიწყება. ელექტრონული მუსიკის ფესტივალი Summer Set 27 ივლისის ღონისძიებაზე ცნობილ მუსიკოსებს უმასპინძლებს. Cigarettes After Sex, WhoMadeWho, Koreless, Gidge და Baikal პირველი ჰედლაინერები იქნებიან, რომლებიც ფესტივალს გახსნიან.

Summer Set 2019 წლიდან გუდაურში გადაინაცვლებს და ყოველი წლის ზაფხულში ჩატარდება. ფესტივალის ახალი ჰიბრიდული მოდელის ფილოსოფია საქართველოს მთის კურორტებს, ელექტრონულ და ინსტრუმენტულ მუსიკას, სპორტის 9 სახეობას და სოციალურ-კულტურულ თემებზე სხვადასხვა ვორქშოპებს გააერთიანებს.

Summer Set-ის დღევანდელ ღონისძიებაზე ბილეთების შეძენა ონლაინ შეგიძლიათ.