საქართველოს პრეზიდენტი გიორგი მარგველაშვილი, დღეს, 17 ივლისს გამართულ ბრიფინგზე, მინდელის შახტაზე მომხდარ აფეთქებას გამოეხმაურა. პრეზიდენტის თქმით, მეშახტეებს მხოლოდ ორი ალტერნატივა აქვთ.

"გამოსავალი არის ის, რომ ჩვენ უნდა ვიმოქმედოთ მეშახტეთა ინტერესებიდან გამომდინარე. ალტერნატივა, ან მოკვდი შიმშილით შახტის გარეთ, ან შედი სიცოცხლის რისკის ფასად შახტაში, არის კატასტროფული ალტერნატივა. და ცუდია, რომ ჩვენ ამ ალტერნატივის სისხლიან შედეგებს ვხედავთ", - ამბობს მარგველაშვილი.

გუშინ, 16 ივლისს ტყიბულში, მინდელის შახტაში კიდევ 4 ადამიანი გარდაიცვალა. ამ თემის შეფასებისას კი საქართველოს პარლამენტის თავმჯდომარემ ირაკლი კობახიძემ განაცხადა, რომ საპარლამენტო უმრავლესობას შრომის უსაფრთხოების შესახებ კანონის გამკაცრება უნდოდა, თუმცა წინა მთავრობამ მათ ამის საშუალება არ მისცა.