აფხაზეთის დე-ფაქტო მთავრობის პრემიერ-მინისტრმა არტურ მიქვაბიამ განაცხადა, რომ ამ ეტაპზე აფხაზეთი ელექტროენერგიას რუსეთისგან საქართველოს დახმარებით მიიღებს. ამის შესახებ ინფორმაციას Ekhokavkaza ავრცელებს.

როგორც სოხუმში გამართულ პრესკონფერენციაზე მიქვაბიამ აღნიშნა, აფხაზეთის ტერიტორიაზე მოქმედი ერთადერთი ელექტრო სადგური-ენგურჰესი უამინდობის გამო შეფერხებით მუშაობს. მისი თქმით, ამის მიზეზი წყალსაცავში არსებული წყლის დონის კრიტიკულ ზღვრამდე დაწევაა. მიქვაბიამ განმარტა, რომ ჰესის გეგმიურმა გათიშვებმა(სისტემის მწყობრიდან გამოსვლის თავიდან აცილების მიზნით) მოქალაქეებს სერიოზული პრობლემები შეუქმნა და ამიტომ ელექტრო ენერგიის სხვა წყაროს მოძებნა გახდა საჭირო.

დე-ფაქტო მთავრობის პრემიერის თქმით, აფხაზეთმა დახმარებისათვის რუსეთს მიმართა. თუმცა, რადგან ელექტრო ენერგიის მიღება მხოლოდ თბილისში მდებარე სადისპეტჩეროს მეშვეობით არის შესაძლებელი, საკითხის მოგვარებაში საქართველოს ჩარევა აუცილებელი გახდა. მოლაპარაკებები რუსეთის, საქართველოსა და აფხაზეთის მხარეებს შორის წარიმართა.

“სადისპეტჩერო სისტემა საბჭოთა სისტემის დროსაც არსებობდა. თუკი რუსეთისგან ელექტრო ენერგიის მიღება გვსურს, ეს თბილისში მდებარე სადისპეტჩერომ უნდა გააკეთოს. ვფიქრობ, რომ მოლაპარაკებები წარმატებით დასრულდა. გეგმიური გათიშვები აღარ იქნება და რაც მთავარია, მოსახლეობისთვის ელექტრო ენერგიის ტარიფი არ გაიზრდება“, - განაცხადა მიქვაბიამ.

დე-ფაქტო პრემიერის განმარტებით, ელექტრო ენერგიის მიღების მსგავსი პრაქტიკისთვის აფხაზეთს აქამდეც არაერთხელ მიუმართავს, უბრალოდ ამჯერად განსხვავება ისაა, რომ ახლა ელექტრო ენერგიაზე აფხაზეთის მოთხოვნა გაზრდილია.

ცნობილია, რომ რუსეთის მხრიდან აფხაზეთის მიერ მოხმარებული ელექტრო ენერგიის ამოღება ზაფხულის თვეებში მოხდება, როდესაც ენგურჰესზე ენერგიის გამომუშავება მკვეთრად გაიზრდება.