შინაგან საქმეთა სამინისტროს ცნობით, 1977 წელს დაბადებული მიხეილ ვ. განზრახ მკვლელობის მცდელობის ბრალდებით დააკავეს.

საუბარია 18 ივლისს, აღსრულების ეროვნულ ბიუროსთან მომხდარ ინიციდენტზე, რომელშიც მონაწილე სამივე პირი შინაგან საქმეთა სამინისტროს ყოფილი თანამშრომლები არიან.

უწყების ცნობით, გამოძიებამ დაადგინა, რომ 1966 წელს დაბადებულმა ავთანდილ ანთაძემ თბილისში, აღსრულების ეროვნული ბიუროს ავტოსადგომზე, შურისძიების ნიადაგზე, ცეცხლსასროლი იარაღიდან გასროლით, ნაცნობი - 1972 წელს დაბადებული არჩილ მამაგეიშვილი დაჭრა, ხოლო მისმა თანმხლებმა ასევე ცეცხლსასროლი იარაღიდან გასროლით, თავად ავთანდილ ანთაძე დაჭრა. არჩილ მამაგეიშვილი საავადმყოფოში გარდაიცვალა. ავთანდილ ანთაძე კი კლინიკაში, პოლიციის ზედამხედველობის ქვეშ იმყოფება.

სამართალდამცველებმა მესამე პირი თბილისში, მომხდარიდან რამდენიმე საათში დააკავეს. პოლიციამ დანაშაულის ჩადენის იარაღები ნივთმტკიცებად ამოიღო.

გამოძიება სისხლის სამართლის კოდექსის 19-108-ე და 108-ე მუხლებით, განზრახ მკვლელობის მცდელობის და განზრახ მკვლელობის ფაქტზე მიმდინარეობს.