საქართველოს პარლამენტმა ინოვაციებისა და ტექნოლოგიების სააგენტოს მიერ შემუშავებული კანონი ინოვაციების შესახებ მიიღო.

კანონშია მითითებულია, რომ მისი მიზანია სოციალურ ეკონომიკური განვითარებისათვის აუცილებელი ეროვნული ინოვაციების ეკოსისტემის შექმნა და სრულყოფა.

ასევე, საქართველოში შექმნილი ინტელექტუალური საკუთრების, ტექნოლოგიების დანერგვისა და ექსპორტის ხელშეწყობა.

კანონპროექტს შემოაქვს ახალი სამართლებრივი ცნებები და ტერმინები. მათ შორის, ინოვაცია, რომელიც კანონპროექტით მოიცავს არამხოლოდ ინოვაციურ პროდუქტს, არამედ ინოვაციურ პროცესს. კანონის თანახმად, შედეგად, ინოვაციები ფართო მასშტაბით გავრცელდება.

გარდა ამისა, კანონპროექტი განსაზღვრავს საქართველოს ინოვაციების და ტექნოლოგიების სააგენტოს ძირითად ამოცანებს, რომლის თანახმადაც სააგენტომ ხელი უნდა შეუწყოს ინოვაციების კომერციალიზაციას და ინოვაციების და ტექნოლოგიების გამოყენების სტიმულირებას.

საქართველოს ინოვაციებისა და ტექნოლოგიების სააგენტოს თავმჯდომარის მოადგილის, ავთანდილ კასრაძის განცხადებით, ინოვაციების შესახებ კანონი ერთი მხრივ უფრო მეტ ინოვაციური სტარტაპს გააჩენს და მეორე მხრივ წაახალისებს წამყვან კომპანიებს, მიმართონ თავიანთი ფინანსები კვლევებსა და განვითარებაზე.

მისივე თქმით, კანონით სახელმწიფოში მნიშვნელოვნად მოწესრიგდება ინოვაციური საქმიანობის დაფინანსება და ინოვაციების ხელშემწყობი ინფრასტრუქტურების განვითარება:

"მოხდება მეცნიერთა და გამომგონებელთა სამართლებრივი უფლებების დაცვა და მათთვის გარანტირებული შემოსავლის უზრუნველყოფა. კანონი განამტკიცებს ინტელექტუალური საკუთრების უფლების დაცვას და ერთმნიშვნელოვნად განსაზღვრავს სახელმწიფოს ჩაურევლობას საპატენტო უფლებებში. გარდა ამისა, კანონი შესაძლებელს ხდის გაიცეს ინოვაციების სააგენტოს მიერ სახელმწიფო გრანტები მეწარმე სუბიექტებზე ინოვაციური საქმიანობის განსახორციელებლად".

ტექნოპარკის განცხადებით, ინოვაციების შესახებ საქართველოს კანონი დაფუძნებულია აშშ-ს Bayh Dole კანონზე. მათივე თქმით, ამ კანონის მიღებით, აშშ-ში უდიდესი ტრანსფორმაცია განიცადა ინოვაციების განვითარებამ, ხელი შეუწყო კერძო სექტორის ჩართულობას და კომერციალიზაციას.