შსს აცხადებს, რომ გენერალ სამსონ ქუთათელაძის მკვლელობის საქმეზე მიმდინარე გამოძიების ფარგლებში, საქმის ერთ-ერთი მოწმის, მარიამ ჭანტურიას ავტომანქანაში ფარულ ვიდეო-აუდიო ჩაწერას ახორციელებდა.

უწყების ინფორმაციით, ფარული მოსმენა ხორციელდებოდა რუსთავის სასამართლოს 2018 წლის 5 თებერვლის და 6 მარტის განჩინებების საფუძველზე, 6 აპრილამდე. ხოლო, 20 აპრილს სასამართლოს განჩინებით, აუდიო-ვიდეო ტექნიკის მოხსნის გადაწყვეტილება მიიღეს.

შსს-ს ცნობით, 20 აპრილს რუსთავის სამმართველოს გამომძიებელმა ჭანტურია მის მიმართ ჩადენილი თაღლითობის ფაქტთან დაკავშირებით, საგამოძიებო მოქმედების განხორციელების მიზნით დაიბარა.

"იმ დროს, როდესაც მარიამ ჭანტურია პოლიციის განყოფილებაში იმყოფებოდა, სამართალდამცველები განყოფილების ეზოში სასამართლოს განჩინებით დამონტაჟებული ფარული აუდიო-ვიდეო ტექნიკის დემონტაჟს ახორციელებდნენ. ჭანტურიამ შენიშნა და ამის შესახებ გენერალურ ინსპექციასა და საპატრულო პოლიციას აცნობა", - ნათქვამია განცხადებაში.

უწყების ინფორმაციით, მარიამ ჭანტურია ქვემო ქართლის საოლქო პროკურატურაში დაიბარეს, რათა გაეცნოს მის მიმართ განხორციელებული ფარული საგამოძიებო მოქმედებების საფუძველს.

ადვოკატი აცხადებს, რომ 6 აპრილიდან 20 აპრილამდე უკანონოდ უსმენდნენ მარიამ ჭანტურიას.

"პირველი სირცხვილი ვერ გადაიტანა შინაგან საქმეთა სამინისტრომ. უნდოდა ამ საქმეზე დაეკავებინათ ჩემი ძმა. ამ სირცხვილის ჩამორეცხვას ასეთი გზებით ცდილობს", - ამბობს მარიამ ჭანტურია.

2018 წლის იანვარში, გენერალ სამსონ ქუთათელაძის მკვლელობის საქმეზე დაკავებულ გიორგი ჭანტურიას ბრალი არ წარედგინა და გაათავისუფლეს. პოლიციამ ის სისხლის სამართლის კოდექსის 236-ე მუხლის მე-2 ნაწილით დააკავა, რაც საბრძოლო მასალის მართლსაწინააღმდეგო შეძენა-შენახვას გულისხმობს.

რუსთავში ე.წ. სტამბოლის ბაზრობაზე ყოფილი პარლამენტარი, სამსონ ქუთათელაძე ცეცხლსასროლი იარაღით 15 იანვარს მოკლეს. საკუთარ კაბინეტში მოკლულ ბაზრობის დირექტორს ცეცხლსასროლი იარაღით 6 ჭრილობა აქვს მიყენებული.