სახალხო დამცველი თბილისის სახელმწიფო უნივერსიტეტში 14 მარტს მომხდარ ძალადობის ფაქტებს, ასევე, პოლიციისა და თსუ-ის დაცვის სამსახურის არაეფექტურ მუშაობას გმობს. ომბუდსმენის აზრით, არსებულ ვითარებაში პოლიციის მობილიზებასა და ყურადღებას განსაკუთრებული მნიშვნელობა ენიჭება.

განცხადებაში აღნიშნულია, რომ თსუ-ში მიმდინარე პროცესების გათვალისწინებით, აუცილებელია პოლიციას სათანადო ვერბალური კომუნიკაცია ჰქონდეს აქციის მონაწილეებთთან. მისი თქმით, აქციის მონაწილეებისათვის ცალკეული საკითხების განმარტება აუცილებელია სიტუაციის შემდგომი გართულების თავიდან აცილების მიზნით:

"აუცილებელია, რომ როგორც პოლიციამ, ასევე თსუ-ის დაცვის სამსახურმა უზრუნველყოს თანაბარი მიდგომა ორივე აქციის მონაწილეთა მიმართ, მათ შორის შენობაში შესვლისა და გადაადგილების კუთხით. შენობაში შესვლის შეზღუდვა კი დასაბუთებული და პროპორციული ღონისძიება უნდა იყოს და არ უნდა გამოიწვიოს თავად შეკრების თავისუფლების შეზღუდვა".

ომბუდსმენი მოუწოდებს სათანადო ორგანოებს, ეფექტური რეაგირება მოახდინონ ძალადობის ფაქტებზე და დამნაშავეები სათანადოდ დაისაჯონ. სახალხო დამცველს ასევე მიაჩნია, რომ გამოძიებამ პოლიციისა და თსუ-ის დაცვის სამსახურის თანამშრომლების მიერ მათზე დაკისრებული მოვალეობების ჯეროვნად შესრულების საკითხიც უნდა გამოიძიოს.

განცხადებაში ასევე წერია, რომ რადგან სტუდენტები უკვე რამდენიმე დღეა, რაც პროტესტს გამოხატავენ და სისტემური ცვლილებებს მოითხოვენ, აღნიშნულით სათანადო უწყებები უნდა დაინტერესდნენ და შემხვედრი ნაბიჯები გადადგან:

"გამოვხატავ პირად დაინტერესებას უნივერსიტეტში ე.წ. "ოდეერის" ფუნქციონირებასთან დაკავშირებით და ვგეგმავ გამოვიყენო ჩემს ხელთ არსებული ყველა ბერკეტი ამ მიმართულებით არსებული ვითარების კანონიერების შესასწავლად. მზადყოფნას გამოვთქვამ, ჩავერთო უმაღლესი განათლების სფეროში მოქმედი კანონმდებლობის გაუმჯობესების პროცესში, რათა გამოირიცხოს არასამართლიანი და უთანასწორო მიდგომა სტუდენტებს შორის და მათი უფლებებისა და კანონიერი ინტერესებისათვის საზიანო ვითარების არსებობა".

გუშინ, 14 მარტს, თსუ-ს ეზოში აუდიტორია 115-სა და უნივერსიტეტის თვითმმართველობის ორი აქცია პარალელურ რეჟიმში მიმდინარეობდა. მოგვიანებით სტუდენტთა აღნიშნული ორი ჯგუფი ერთმანეთს ფიზიკურად დაუპირისპირდა. შენობაში მყოფ სამართალდამცავ ორგანოებს ფაქტზე სათანადო რეაგირება არ მოუხდენიათ.

სწორედ ამ შეტაკებების დროს ჟურნალისტებისათვის პროფესიულ საქმიანობაში ხელის შეშლის 3 შემთხვევა დაფიქსირდა. კერძოდ, ლიბერალის ჟურნალისტს თვითმმართველობის აქციის ერთ-ერთმა მონაწილემ ყელში წაუჭირა და მისი ძირს დაგდება სცადა, წაართვა ტელეფონი და მოპოვებული ჟურნალისტური მასალა წაუშალა. ლიბერალის მეორე ჟურნალისტს კამერა ძირს დააგდებინეს და გაუტეხეს. ნეტგაზეთის ჟურნალისტს კი წაართვეს ტელეფონი, რომლითაც ის არსებულ ვითარებას იღებდა, დაცვის თანამშრომელმა კი მას ტერიტორიის დატოვებისკენ მოუწოდა.

ჟურნალისტების თქმით, მიუხედავად იმისა, რომ უნივერსიტეტის დაცვის სამსახურისა და პოლიციის წარმომადგენლები მიმდებარე ტერიტორიაზე იმყოფებოდნენ, მათ არ მიიღეს ეფექტური ზომები ძალადობის თავიდან ასაცილებლად და მათ აღსაკვეთად.