დღეს, 5 აპრილს, გამთენისას ტყიბულის მინდელის შახტში ექვსი მუშა გარდაიცვალა, ხოლო სამი მძიმედ დაშავდა. ერთ-ერთი დაშავებული მუშა, მურმან აშოთია ჰყვება, რომ შახტში ჭერი ჩამოინგრა, რამაც ჰაერის დიდი მასა წარმოქმნა.

"სახეში დიდი წნევით ჰაერის მასა მომხვდა. მივიხედე იქით, საიდანაც მოდიოდა წნევა, მხედველობა აღარ იყო. წამებში მოვტრიალდი ჰაერის მასამ კიბეზე მიმახეთქა, თუმცა გონება არ დამიკარგავს. ვეცადე ქვევით ჩავუსლიყავი, რომ დავაპირე შესვლა ჰაერის მასამ ძირს ჩამომაგდო. სადაც ნახშირი გამოდის, იქ ჭერი ჩამოინგრა, დიდი სივრცე იყო და ამან გამოიწვია ჰაერის მასა", - ამბობს აშოთია.

შახტში კიდევ ორი დაშავებულის მდგომარეობა სტაბილურად მძიმეა.

შპს საქნახშირის გენერალური დირექტორის ჯამბულ ჯაყელის განცხადებით, მინდელის შახტში უსაფრთხოების ნორმების დაცულობა, გასული წლის დეკემბერში შემოწმდა.

გეგმიური შემოწმება ზედამხედველობის სამსახურმა და ჯანდაცვის სამინისტროს წარმომადგენლებმა ჩაატარეს.

ჯამბულ ჯაყელის თქმით, მუშების გარდაცვალება ჰაერის ჭავლმა გამოიწვია, რომელმაც ისინი კედელზე მიახეთქა.

მომხდარ ფაქტთან დაკავშირებით გამოძიება საქართველოს სსკ-ს 240-ე მუხლის მეორე ნაწილით დაიწყო, რაც სამთო, სამშენებლო ან სხვა სამუშაოების წარმოებისას უსაფრთხოების წესების დარღვევას გულისხმობს. დანაშაული 5 წლამდე თავისუფლების აღკვეთას ითვალისწინებს.

გაიგეთ მეტი: