სახელმწიფო უსაფრთხოების სამსახურის განცხადებით, საქართველოს ოკუპირებული რეგიონები ფინანსურად დიდწილად რუსეთის ცენტრალურ ბიუჯეტზე არიან დამოკიდებული.

სუს-ის მონაცემების მიხედვით, 2017 წელს რუსეთიდან მიღებული ფინანსური დახმარების წილი დე ფაქტო აფხაზეთის ე.წ. სახელმწიფო ბიუჯეტში დაახლოებით 48% (88 მილიონი აშშ დოლარი) იყო, ხოლო ცხინვალის რეგიონის "ბიუჯეტში" დაახლოებით 90% (121 მილიონი აშშ დოლარი) შეადგინა.

სუს-ის ანგარიშში აღნიშნულია ოკუპირებულ ტერიტორიებზე უკანონო ფინანსური ოპერაციების შესახებ. სუს-ის ინფორმაციით, ბოლო პერიოდში, დე ფაქტო ცხინვალის რეგიონის ე.წ. ლიდერები უკრაინის თვითგამოცხადებული ლუგანსკისა და დონეცკის სახალხო რესპუბლიკებთან თანამშრომლობის კუთხით გააქტიურდნენ. ასევე, ანგარიშში ნათქვამია ისიც, რომ ოკუპირებულ ცხინვალში რუსული საბანკო სექტორი ოპერირებს, რომელიც, შესაძლებელია, უკანონო ფინანსურ ოპერაციებში აქტიურად იყოს ჩართული.