საქართველოს საგარეო საქმეთა სამინისტროს განცხადებით, 27-28 მარტს გამართული ჟენევის მოლაპარაკებებისას, რუსეთმა დესტრუქციული მიდგომა გამოიჩინა. ქართული მხარის განცხადებით, რუსეთმა "მიზანმიმართული პროვოკაციული განცხადებებით" ჩიხში შეიყვანა მოლაპარაკებები ძალის არგამოყენების საკითხზე.

ქართულმა მხარემ შეხვედრისას განმარტა, რომ ძალის არგამოყენების შესახებ ჟენევის საერთაშორისო მოლაპარაკებების განცხადების პროექტი, უნდა ემსახურებოდეს კონკრეტულ მიზანს - 2008 წლის 12 აგვისტოს ცეცხლის შეწყვეტის შეთანხმების შესრულების პროცესის დაწყებას.

ჟენევაში გამართული შეხვედრისას განხილვის მთავარი საგანი იყო არჩილ ტატუნაშვილის სიცოცხლის უკანონო ხელყოფა და საქართველოს ოკუპირებულ რეგიონებში უსაფრთხოების საერთაშორისო მექანიზმების შექმნა.

ოთხოზორია-ტატუნაშვილის საქმე

საგარეო უწყების ინფორმაციით, ჟენევაში ქართველმა მხარემ ტატუნაშვილის მკვლელობაზე სრული პასუხისმგებლობა დააკისრა რუსეთს, როგორც ოკუპირებულ რეგიონებში ეფექტური კონტროლის განმახორციელებელ ძალას.

"მონაწილეებმა საქართველოდან რუსეთის ფედერაციას მოუწოდეს, არ შეუქმნას დაბრკოლება გამოძიებას. მათ ასევე, ხაზი გაუსვეს გიგა ოთხოზორიას მკვლელის დაუყოვნებლივი დაკავების აუცილებლობას", - ნათქვამია საგარეო საქმეთა სამინისტროს განცხადებაში.

ქართული მხარე ასევე აცხადებს, რომ ჟენევის შეხვედრაზე, თანათავმჯდომარეებმა და მონაწილეებმა საქართველოდან არჩილ ტატუნაშვილის, უკანონო დაკავება და სიცოცხლის ხელყოფა დაგმეს: "მათ არაჰუმანურ ქმედებად შეაფასეს ოჯახისათვის ცხედრის გადაცემის თითქმის ერთი თვით დაყოვნება".

ვითარება ოკუპირებულ რეგიონებში

საქართველოს საგარეო უწყების ცნობით, ოკუპირებულ რეგიონებში მიმდინარე მილიტარიზაცია და უკანონო სამხედრო წვრთნები ადგილზე ვითარების დესტაბილიზაციის მცდელობად შეფასდა.

საგარეო საქმეთა სამინისტრო ეთნიკური წმენდის გაგრძელებად აფასებს აფხაზეთის რეგიონის მკვიდრი ქართველი მოსახლეობის იძულებით დარეგისტრირებას უცხოელებად.

საგარეო უწყების ცნობით, თანათავმჯდომარეებმა და მონაწილეებმა საქართველოდან და აშშ-დან იძულებით გადაადგილებულ პირთა და ლტოლვილთა დაბრუნებაზე საგნობრივი განხილვების აუცილებლობაზე ისაუბრეს.

ქართული ხმარის განცხადებაში აღნშნულია, რომ რუსეთის ფედერაციამ და საოკუპაციო რეჟიმებმა ჰუმანიტარული თემები პოლიტიკურ ჭრილში განიხილეს და დევნილთა საკითხის განხილვისას, ისევე როგორც ადრე, ახლაც დატოვეს მოლაპარაკებები.

ჟენევის საერთაშორისო მოლაპარაკებები შექმნილია 2008 წლის 12 აგვისტოს ცეცხლის შეწყვეტის შესახებ შეთანხმების საფუძველზე. მოლაპარაკებების მორიგი რაუნდი გაიმართება 2018 წლის ივნისში.