მასაჩუსეტსის ტექნოლოგიური უნივერსიტეტის მიერ ჩატარებული კვლევის შედეგად აღმოჩნდა, რომ ყალბი ახალი ამბები Twitter-ზე გაცილებით უფრო სწრაფად ვრცელდება, ვიდრე ნამდვილი ინფორმაცია. ამის შესახებ ინფორმაციას CNN ავრცელებს, ხოლო კვლევა Science Magazine-ის გვერდზე გამოქვეყნდა.

კვლევის ერთ-ერთი ხელმძღვანელი სინან არალი უკანასკნელი წლების განმვალობაში აკვირდებოდა, თუ რა როლს თამაშობს სოციალური მედია და იქ გავრცელებული ყალბი ამბები ამა თუ იმ საკითხზე შეხედულების ფორმირებაში. როგორც აღმოჩნდა, ყალბი ახალი ამბების გავლენა ამ მიმართულებით საკმაოდ ხელშესახები და საგრძნობია.

კვლევა დაახლოებით ორი წლის განმავლობაში გრძელდებოდა. კვლევა მოიცავდა 2006-დან 2017 წლამდე მონაკვეთს. სპეციალისტებმა შეისწავლეს ამ პერიოდში ტვიტერზე გავრცელებული ათასობით ისტორია და ტვიტები. კვლევა მხოლოდ Twitter-ს შეეხებოდა, თუმცა, მკვლევარების თქმით, ნაკლებად სავარაუდოა, რომ სხვა სოციალურ ქსელებში განსხვავებული შედეგი დაფიქსირდეს.

ყალბი ახალი ამბების მიმართულებით, ყველაზე სწრაფად და ფართოდ ის ინფორმაცია ვრცელდება, რომელიც პოლიტიკური ხასიათისაა. გარდა ამისა, ყალბ ახალ ამბებს ძირითადად ის მომხმარებლები ავრცელებენ, რომლებიც ზოგადად არ არიან ქსელის აქტიური მომხმარებლები და ნაკლები მეგობრები ჰყავთ.

კვლევის ავტორები ამბობენ, რომ ყალბი ამბების გავრცელების პროცესის შესწავლა დეზინფორმაციასთან ბრძოლის პირველი ნაბიჯია. კვლევის ავტორები ასევე მიესალმებიან სპეციალური ალგორითმის გამოყენებას ყალბი ინფორმაციის გავრცელების წინააღმდეგ.