ვარშავაში 8-9 ივლის NATO-ს სამიტი იმართება, რომელსაც საქართველოს პრეზიდენტთან ერთად რამდენიმე მინისტრი და უშიშროების საბჭოს მდივანი იმყოფება. მსოფლიოს სხვადასხვა ქვეყნის ლიდერთან ერთად ვარშავაში უკვე ჩაფრინდა აშშ-ს პრეზიდენტი ბარაკ ობამა.

საქართველოს პრეზიდენტის ადმინისტრაციის ინფორმაციით, გიორგი მარგველაშვილი სიტყვით გამოვა ნატოს წევრი და პარტნიორი ქვეყნების სახელმწიფო და მთავრობის მეთაურების შეხვედრაზე, რომელიც ავღანეთის თემაზე - "მტკიცე მხარდაჭერის მისი" იმართება.

ქვეყნის პირველი პირი ნატოს პარტნიორი ქვეყნების დელეგაციათა ხელმძღვანელების პატივსაცემად გამართულ სამუშაო სადილსაც დაესწრება.

სამიტის ფარგლებში პირველად იმართება ნატო-საქართველოს კომისიის სხდომა, სადაც დაგეგმილია საქართველოს საგარეო საქმეთა მინისტრის მონაწილეობა, მიხეილ ჯანელიძე ასევე დაესწრება სამუშაო ვახშამს, რომელიც ნატოს წევრი და პარტნიორი ქვეყნების საგარეო საქმეთა მინისტრების პატივსაცემად იმართება.

პრეზიდენტის ადმინისტრაციის ცნობით, მნიშვნელოვან შეხვედრებს გამართავს თავდაცვის მინისტრი თინა ხიდაშელიც.