ევროსაბჭოს კონგრესის პრეზიდენტი გუდრუნ მოსლერ-ტორსტრო, ოკუპირებულ ტერიტორიაზე არჩილ ტატუნაშვილის დაღუპვას ეხმაურება:

"მსურს მეც შევუერთდე საერთაშორისო საზოგადოებას და შეშფოთება და მწუხარება გამოვხატო ამ ტრაგიკული ამბის მიმართ".

კონგრესის პრეზიდენტის განცხადებით, აუცილებელია გამჭვირვალე გამოძიება, რათა სასწრაფოდ გაირკვეს სიკვდილის გარემოებები და დადგეს პასუხისმგებლობის საკითხი. მისივე თქმით, ტატუნაშვილთან ერთად დაკავებული კიდევ ორი პირი სასწრაფოდ უნდა გადმოიყვანონ ცენტრალური ხელისუფლების მიერ კონტროლირებად ტერიტორიაზე.

კონგრესის პრეზიდენტი ხაზგასმით აცხადებს, რომ კონგრესი მხარს უჭერს საქართველოს ტერიტორიული მთლიანობას და სამძიმარს უცხადეს გარდაცვლილი ტატუნაშვილის ოჯახს.

დღეს, გაეროს ადამიანის უფლებათა უმაღლესი კომისრის ოფისმა არჩილ ტატუნაშვილის საქმეზე გამოძიებას მოითხოვა.

ასევე, ევროსაბჭოს საპარალამენტო ასამბლეის თანამომხსენებლებმა, კერსტინ ლუნდგრენმა და ტიტუს ქორლატინმა ცხვინვალში საქართველოს მოქალაქის, არჩილ ტატუნაშვილის გარდაცვალების ფაქტი დაგმეს და შეშფოთება გამოთქვეს.

ამერიკის შეერთებული შტატების საელჩომ თბილისში პასუხისმგებელ პირებს, მათ შორის, რუსულ მხარეს მოუწოდა სრული ინფორმაცია მიაწოდონ საქართველოს მთავრობას არჩილ ტატუნაშვილის გარდაცვალების შესახებ.

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ პოზიცია შეცვალა.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი უკვე გაათავისუფლეს.