ოკუპირებულ ახალგორში არჩილ ტატუნაშვილთან ერთად დაკავებული საქართველოს ორი მოქალაქე, ლევან ქუტაშვილი და იოსებ პავლიაშვილი გაათავისუფლეს.

ამის შესახებ ინფორმაცია On.ge-ს სახელმწიფო უსაფრთხოების სამსახურში დაუდასტურეს.

სუს-ის ინფორმაციით, ამ დროისათვის ისინი ოკუპირებულ ახალგორში იმყოფებიან.

სახელმწიფო უსაფრთხოების სამსახური რუსეთის საოკუპაციო ძალებს და დე ფაქტო ხელისუფლების წარმომადგენლებს მოუწოდებს, რომ მათ ცენტრალური ხელისუფლების მიერ კონტროლირებად ტერიტორიაზე გადმოსვლის პროცესში არ შეუქმნას რაიმე ტიპის ბარიერი.

სახელმწიფო უსაფრთხოების სამსახური აცხადებს, რომ გაურკვეველ ვითარებაში გარდაცვლილი საქართველოს მოქალაქის, არჩილ ტატუნაშვილის გადმოსვენების საკითხზე, დე ფაქტო ხელისუფლებასთან მოლაპარაკებები გრძელდება.

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს.

ახალგორში არჩილ ტატუნაშვილთან ერთად დაკავებული იყო საქართველოს ორი სხვა მოქალაქე. შერიგებისა და თანასწორობის სახელმწიფო მინისტრის, ქეთევან ციხელაშვილის თქმით, მათ გასათავისუფლებლად ცხელი ხაზის მეშვეობით მიმდინარეობდა მუშაობა.