ახალგორის გამგებელი ნუგზარ თინიკაშვილი, ცხინვალში არჩილ ტატუნაშვილის დაღუპვას გამოეხმაურა და ოკუპირებული რეგიონის დე ფაქტო მმართველობას "კრიმინალების ბანდა" უწოდა. ტელეკომპანია რუსთავი 2-თან საუბრისას მან ასევე, მომხდარზე პასუხისმგებლობა ყოფილ ხელისუფლებას დააკისრა:

"ეს არის კრიმინალების ბანდა, რომელიც მართავს იმ გარკვეულ ტერიტორიას, რაც დროებით წართმეულია. მინდა ცალსახად განვაცხადო, რომ ამ სისხლზე, რომელიც კიდევ დაიღვარა, თავიდან ბოლომდე ამაზე პასუხისმგებლობა ეკისრება, მიხეილ სააკაშვილსა და ნაციონალურ მოძრაობას".

ნუგზარ თინიკაშვილის თქმით, გუშინდელი შეთანხმებით, დღეს უნდა გადმოეცეს ოჯახს არჩილ ტატუნაშვილის ცხედარი.

მისივე ინფორმაციით, ჟენევის მოლაპარაკების თანათავმჯდომარეებსა და ელჩებს, მათ ვინც ამ პროცესში ჩართულები არიან, ოსურმა მხარემ პირობა მისცა, რომ ცხედარს გადმოასვენებენ.

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის განცხადებით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.