საქართველოს შინაგან საქმეთა სამინისტროში აცხადებენ, რომ გენერალ სამსონ ქუთათელაძის მკვლელობის საქმეზე გიორგი ჭანტურიას დაკითხვა გამოძიების სტანდარტული და აპრობირებული ტაქტიკაა. უწყებამ განცხადება დღეს, 22 იანვარს გაავრცელა.

"შესაბამისად, ყოველგვარი განცხადებები ზეწოლის შესახებ სამართლებრივ საფუძველს მოკლებულია და წარმოადგენს გიორგი ჭანტურიას ადვოკატის ტაქტიკას არასწორი საზოგადოებრივი აზრის ფორმირებისთვის", - დასძენენ უწყებაში.

მათივე განმარტებით, მტკიცებულებებით გამოიკვეთა, რომ ჭანტურიამ ქუთათელაძე მკვლელობამდე ნახა.

"შესაბამისად, გამოკითხვის დროს, ჭანტურიას სამართალდამცველებმა დაუსვეს ლოგიკური კითხვები მკვლელობასთან მის შესაძლო კავშირთან დაკავშირებით", - დასძენენ უწყებაში.

რუსთავში ე.წ. სტამბოლის ბაზრობაზე ყოფილი პარლამენტარი, სამსონ ქუთათელაძე ცეცხლსასროლი იარაღით 15 იანვარს მოკლეს. საკუთარ კაბინეტში მოკლულ ბაზრობის დირექტორს ცეცხლსასროლი იარაღით 6 ჭრილობა აქვს მიყენებული.

ამ საქმეზე მოწმის სტატუსით ერთხელ უკვე დაიკითხა გიორგი ჭანტურია. მის ადვოკატის თქმით, შინაგან საქმეთა მინისტრის პირველი მოადგილე კახაბერ საბანაძე მკვლელობის აღიარებას სთხოვდა.