ამერიკის სახელმწიფო დეპარტამენტის მიერ ჩატარებული კვლევის თანახმად, საქართველო ტრეფიკინგთან ბრძოლის კუთხით მეორე კალათიდან პირველში გადავიდა. თუმცა, ის მაინც რჩება ქალებისა და გოგონების ვაჭრობისათვის, ასევე ქალების, კაცებისა და ბავშვების შრომითი ექსპლუატაციისთვის წყაროდ, სატრანზიტო და დანიშნულების მქონე ქვეყნად.

ანგარიშის თანახმად, საქართველოს გავლით ქალები მიჰყავთ თურქეთში, იშვიათად კი ჩინეთსა და გაერთიანებულ ემირატებში, სადაც ტრეფიკინგის მსხვერპლნი ხდებიან ხოლმე. გარდა ამისა, ქალებს აზერბაიჯანიდან და ცენტრალური აზიიდან ხშირად აიძულებენ ჩაერთონ პროსტიტუციაში აჭარაში, სადაც მათ საუნებში, სტრიპტიზ კლუბებში, ბარებსა და სასტუმროებში მუშაობას აიძულებენ.

ანგარიშში წერია, რომ ქალები და კაცები საქართველოს გავლით ხშირად მიჰყავთ თურქეთში, კვიპროსზე, ეგვიპტესა და ერაყში, სადაც ისინი იძულებით მუშაობენ. გარდა ამისა, ანგარიშიდან ირკვევა, რომ საქართველოში ქართველ და სხვა ეროვნებების ბავშვებს ხშირად აიძულებენ ქუჩაში მოწყალების თხოვნას და რთავენ მათ სხვადასხვა კრიმინალურ საქმიანობაში.

მიუხედავად იმისა, რომ ანგარიშში აღწერილია სახელმწიფოს მიერ გატარებული რიგი ღონისძიებები იმისთვის, რომ ტრეფიკინგი აღმოიფხვრას, ასევე აღნიშნულია, რომ ხელისუფლებას არაფერი გაუკეთებია ქუჩაში მცხოვრები და მომუშავე ბავშვების პრობლემების აღმოსაფხვრელად.

ყოველივე ზემოაღნიშნულიs გათვალისწინებით, აშშ-ს სახელმწიფო დეპარტამენტმა საქართველოსთვის რიგი რეკომენდაციები შეიმუშავა. კერძოდ, აუცილებელია ტრეფიკინგის მსხვერპლთა იდენტიფიცირება და დასჯა იმ ადამიანებისა, რომლებიც ასეთ ბიზნესს აწარმოებენ და ჩართულნი არიან ადამიანების იძულებით მუშაობაში.

გარდა ამისა, ანგარიშში წერია, რომ აუცილებელია ქუჩაში მცხოვრები და მომუშავე ბავშვების სრულფასოვანი კვლევა, შესაბამისად სტრატეგიის შემუშავება იმისთვის, რომ აღმოიფხვრას ამ ბავშვების მიერ ქუჩაში მოწყალების თხოვნა.

ამასთან, ანგარიშში აღნიშნულია, რომ აუცილებელია სამართალდამცავი ორგანოების თანამშრომლებისათვის ცნობიერებისა და ინფორმატიულობის გაზრდა, მოქალაქეებისთვის სხვადასხვა ტრენინგის ჩატარება და მსხვერპლთათვის ხელმისაწვდომი იურიდიული დახმარების უზრუნველყოფა.