10 არასამთავრობო ორგანიზაცია იუსტიციის სამინისტროს ინიციატივას, კონსტიტუციაში ცვლილებების შეტანაზე, საჯარო ინფორმაციაზე წვდომის გაუარესებად აფასებენ. იუსტიციის სამინისტროს სურს ახალ კონსტიტუციაში არსებული იმ ჩანაწერის გაუქმება, რომლიც საიდუმლო ინფორმაციის სახეებს განსაზღვრავს და მასზე წვდომის შეზღუდვის შემთხვევაში დასაბუთებას მოითხოვს.

"იუსტიციის სამინისტროს ინიციატივა ითვალისწინებს საიდუმლო ინფორმაციის სახეების ამ ჩამონათვალის [სახელმწიფო, კომერციული, პროფესიული ან პირადი საიდუმლო] ამოღებას მის ჩანაცვლებას ბუნდოვანი და სამართლებრივად გაუმართავი დანაწესით", - აღნიშნავენ არასამთავრობო ორგანიზაციები.

მათივე განმარტებით, ვენეციის კომისიას საქართველოს ახალ კონსტიტუციაში იმ მუხლებთან დაკავშირებით კითხვები არ გასჩენიათ, რომლის შეცვლაც იუსტიციის სამინისტროს სურს.

"საქართველო არის ღია მმართველობის პარტნიორობის თავმჯდომარე, რაც ქვეყანას ავალდებულებს არათუ არ გააურესოს საჯარო ინფორმაციის კანონმდებლობა, არამედ იზრუნოს მის დახვეწასა და გაუმჯობესებაზე. განსაკუთრებით სამწუხაროა ის გარემოება, რომ სწორედ იუსტიციის სამინისტრო - უწყება, რომელიც ღია მმართველობის პარტნიორობის სამდივნოს ფუნქციას ასრულებს - ითხოვს ინფორმაციის თავისუფლების რეჟიმის მკვეთრ გაუარესებას", - დასძენენ ორგანიზაციები.

ორგანიზაციები საქართველოს პარლამენტს მოუწოდებენ არ გაითვალისწინონ იუსტიციის სამინისტროს მიერ შეთავაზებული ინიციატივა, რადგან საჯარო ინფორმაციაზე წვდომის უფლების დაცულ სფეროში არათანაზომიერი ჩარევის მაღალ რისკის შემცვლელია.

განცხადებას ხელს აწერენ:

  • საქართველოს ახალგაზრდა იურისტთა ასოციაცია;
  • ინფორმაციის თავისუფლების განვითარების ინსტიტუტი (IDFI);
  • ფონდი ღია საზოგადოება საქართველო;
  • საერთაშორისო გამჭვირვალობა - საქართველო;
  • საქართველოს ჟურნალისტური ეთიკის ქარტია;
  • ადამიანის უფლებების სწავლებისა და მონიტორინგის ცენტრი;
  • სამართლიანი არჩევნებისა და დემოკრატიის საერთაშორისო საზოგადოება;
  • საქართველოს დემოკრატიული ინიციატივა;
  • კონსტიტუციის 42-ე მუხლი;
  • სამოქალაქო განვითარების სააგენტო პარტნიორობა ადამიანის უფლებებისათვის.