თბილისის მერის მოადგილის, ირაკლი ბენდელიანის ინფორმაციით, ისანში, კორპუსი, სადაც რამდენიმე კვირის წინ სპეცოპერაცია ჩატარდა საცხოვრებლად უსაფრთხოა. ბენდელიანმა ამის შესახებ მუნიციპალიტეტის ლაბორატორიის მიერ სამუშაოების დასრულების შემდეგ დღეს, 9 ნოემბერს განაცხადა.

მისივე განმარტებით, დაახლოებით რვა ბინაა, რომელიც აღდგენით სამუშაოებს საჭიროებს. კეთილმოწყობის სამსახურის უფროსის, გივი კუბლაშვილის თქმით, კორპუსის აღდგენითი სამუშაოები ხვალიდან დაიწყება. სამუშაოებისთვის 300 ათასი ლარის დახარჯვა იგეგმება.

21-22 ნოემბრის ისნის სპეცოპერაციის შედეგად, რომელიც დაახლოებით 20 საათის განმავლობაში მიმდინარეობდა, დაიღუპა ერთი სპეცრაზმელი და დაიჭრა ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი. ლიკვიდირებულთაგან ერთ-ერთი ახმედ ჩატაევია.

სპეცოპერაციის გამო მიმდებარე ტერიტორიიდან ევაკუირებული იყო მოსახლეობა, სკოლასა და სამ ბაღში კი სასწავლო პროცესი შეწყდა. სპეცოპერაციის შესახებ არაერთი მნიშვნელოვანი დეტალი და გარემოება ამ დრომდე უცნობია.