ისნის სპეცოპერაციისას ლიკვიდირებულთა შორის ახმედ ჩატაევია. ამის შესახებ სპეციალურ ბრიფინგზე განაცხადა სუს-ის საზოგადოებასთან ურთიერთობის სამსახურის ხელმძღვანელმა ნინო გიორგობიანმა.

გიორგობიანის თქმით, ქართველ სამართალდამცავებს გამოძიების პროცესში დაეხმარნენ ამერიკელი კოლეგებიც, რის შედეგადაც ექსპერტიზის საშუალებით დადგინდა ლიკვიდრებული ჩატაევის ვინაობა. გიორგობიანისვე ინფორმაციით, ორი პირი სამართალდამცავებმა მოკლეს, ჩატაევმა კი თავი აიფეთქა.

როგორც სახელმწიფო უსაფრთხოების სამსახური აცხადებს, ჯერჯერობით არ არის დადგენილი 21-22 ნოემბრის სპეცოპერაციისას ლიკვიდირებული სხვა ორი პირის ვინაობა.

ჯერჯერობით, სუს-ში არ აცხადებენ, როგორ შემოვიდნენ საქართველოში ახმედ ჩატაევი და მისი თანამებრძოლები. უწყების თქმით, გამოძიება გრძელდება.

ვინ არის ახმედ ჩატაევი

ახმედ ჩატაევი საქართველოში 2012 წელს, ლაფანყურის სპეცოპერაციისას დააკავეს. ის იყო მომლაპარაკეებლი საქართველოს ხელისუფლებასა და მებრძოლებს შორის, რომლებიც მოგვიანებით, პოლიციასთან შეტაკებისას მოკლეს ლაფანყურის ტყეში.

ჩატაევს ბრალი ასაფეთქებელი მოწყობილობების მართლსაწინააღმდეგო შეძენა, შენახვა, ტარებისთვის წაუყენეს, თუმცა, ხელისუფლების ცვლილების შემდეგ, 2012 წლის დეკემბერში, ჩატაევი წინასწარი პატიმრობიდან პროკურატურის მოთხოვნით გირაოთი გაათავისუფლეს. 2013 წლის იანვარში კი ჩატაევის მიმართ სისხლის სამართლებრივი დევნა საერთოდ შეწყდა მტკიცებულებების არარსებობის გამო და გირაოს თანხაც უკან დაუბრუნდა. მან საქართველო დატოვა. ბოლო წლებში ის სირიაში იმყოფებოდა და ტერორისტული ორგანიზაცია ისლამური სახელმწიფოს მხარეს იბრძოდა.

21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი.

სპეცოპერაციის გამო მიმდებარე ტერიტორიიდან ევაკუირებული იყო მოსახლეობა, სკოლასა და სამ ბაღში კი სასწავლო პროცესი შეწყდა. სპეცოპერაციის შესახებ არაერთი მნიშვნელოვანი დეტალი და გარემოება ამ დრომდე უცნობია.