გერმანული მედიის ცნობით, ბევრი გერმანელი პილოტი ლტოლვილების დეპორტაციაში მონაწილეობის მიღებაზე უარს აცხადებს.

მემარცხენე პარტიის (Die Linke) მიერ გამოთხოვილი ინფორმაციის მიხედვით, გერმანიის ხელისუფლებამ განაცხადა, რომ 222 დაგეგმილი ფრენა, იმ პილოტების მიერ იქნა ჩაშლილი, ვინც არ ეთანხმება ლტოლვილების ავღანეთში დაბრუნების სადავო გადაწყვეტილებას, რადგან ავღანეთი, მიუხედავად ქვეყანაში არსებული ძალადობისა და რეპრესიებისა, გარკვეულ შემთხვევებში „უსაფრთხო წარმომავლობის ქვეყნად“ მიიჩნიეს.

2017 წლის იანვრ-სექტემბრში განსახორციელებელი 85 ფრენის ჩაშლა, გერმანიის მთავარ ავიაკომპანა Lufthansa-სა და მის შვილობილ Eurowings-ზე მოდის. დაახლოებით 40 ფრენა ჩაიშალა დიუსელდორფის აეროპროტში, საიდანაც სადავო დეპორტაციები მუდმივად საპროტესტო აქციების თანხლებით ხორციელდება.

Lufthansa-ს წარმომადგენელმა, მიხაელ ლამბერტიმ, დაიცვა ის თანამშრომლები რომლებაც გაფრენაზე უარი განაცხადეს. მისი თქმით, ზოგჯერ ფრენის ჩაშლა უსაფრთხოების ზომებიდან გამომდინარე ხდებოდა.

„მგზავრის გადაყვანის გადაწყვეტილება, კონკრეტული გარემოებიდან გამომდინარე, საბოლოო ჯამში, მაინც პილოტის მიერ მიიღება. თუკი იგი მიიჩნევს, რომ არსებობს ზეგავლენა ფრენის უსაფრთხოებაზე, მან უარი უნდა განაცხადოს მგზავრის ტრანსპორტირებაზე“.

ლამბერტის თქმით, ფრენამდე, Lufthansa-ს პილოტები ესაუბრებიან მგზავრებს, რომელთა დეპორტაციაც უნდა მოხდეს. ზოგადად ამ ადამიანებსაც ისე ექცევიან, როგორც ჩვეულებრივ ადამიანებს „ბოლო-ბოლო მათაც ჩვეულებრივი სამგზავრო ბილეთები აქვთ.“

„აეროპორტის თანამშრომლებს, თუკი ექნებათ გარკვეული ინფორმაცია იმის შესახებ, რომ დეპორტაციის დროს სიტუაცია შეიძლება გამწვავდეს - შეუძლიათ არ დართონ მგზავრს თვითმფრინავში ჩაჯდომის უფლება.“

გახშირებული დეპორტაციების მიუხედავად, გერმანია მაინც რჩება მიგრანტებისა და ლტოლვილების უმთავრესი მიმართულების ქვეყნად - 2017 წელს, გერმანიამ, უფრო მეტი თავშესაფარის მაძიებლის მიმართვა განიხილა, ვიდრე ევროკავშირის დანარჩენმა 27 წევრმა ერთად.

გერმანულმა გამოცემა Die Welt Zeitung -მა, ევროპის სტატისტიკის სააგენტოზე დაყრდნობით, გაავრცელა ინფორმაცია, რომ 2017 წლის პირველი ექვსი თვის განმავლობაში, ლტოლვილთა და მიგრაციის ფედერალურმა სამსახურმა (BAMF), თავშესაფრის მოთხოვნის 388 201 განცხადების შესახებ მიიღო გადაწყვეტილება, რაც თითქმის ორჯერ მეტია გასული წლის იმავე პერიოდთან შედარებით, ხოლო სასამართლო კი, დღევანდელი მონაცემებით ყოველ მეოთხე თავშესაფრის მაძიებელს უკმაყოფილებს მიმართვას.

გერმანიის საზოგადოებრივი მაუწყებლის თქმით, აღნიშნული მიმართვები ბერლინს დაახლოებით 19 მილიონი ევრო დაუჯდა, რაც გასულ წელთან შედარებით 7.8 მილიონი ევროთი მეტია.

თავშესაფრის მოთხოვნის შემცირებისა და დეპორტაციების დაჩქარების მიზნით, გერმანიის მთავრობამ ახალი პროგრამა შეიმუშავა, რომელიც 2018 წლის თებერვლიდან ამოქმედდება და თავშესაფრის უარყოფილი მაძიებლების დეპორტაციაზე თანხმობის შემთხვევაში, 3 000 ევროიან კომპენსაციასაც გულისხმობს.