ოკუპირებული სამხრეთ ოსეთის დე-ფაქტო პრეზიდენტი ანატოლი ბიბილოვი მოსკოვში ოფიციალური ვიზიტის ფარგლებში რუსეთის პრეზიდენტ ვლადიმერ პუტინს შეხვდა. ამის შესახებ ინფორმაციას რუსეთის ხელისუფლების მიერ დაფინანსებული Sputnik-ossetia ავრცელებს.

გავრცელებული ინფორმაციით, 14 ნოემბრის შეხვედრაზე პუტინმა ბიბილოვს სავაჭრო-ეკონომიკური თანამშრომლობის გაფართოება შესთავაზა. მანვე აღნიშნა, რომ 2008 წლის ქართულ-ოსური კონფლიქტის შემდეგ მდგომარეობა დასტაბილურდა. პუტინმა აღნიშნა, რომ ამ წლის პირველი ცხრა თვის განმავლობაში ორ ქვეყანას შორის სავაჭრო ბრუნვამ 18 პროცენტით მოიმატა.

პრესკონფერენციაზე ვლადიმერ პუტინმა განაცხადა, რომ უახლოეს დღეებში ე.წ. სამხრეთ ოსეთის რესპუბლიკისთვის 2018-2019 წლის საინვესტიციო პროგრამას დაამტკიცებენ, ასევე მომზადდა შეღავათიანი სესხების სპეციალური პაკეტი, რომელიც ერთ მილიარდ რუბლს მოიცავს.

"სამხრეთ ოსეთის განვითარებისთვის რუსეთი გააგრძელებს რესურსების გამოყოფას", - განაცხადა პუტინმა.

ოკუპირებული სამხრეთ ოსეთის დე-ფაქტო პრეზიდენტმა, ანატოლი ბიბილოვმა შეხვედრისას განაცხადა, რომ ისინი მუშაობენ იმისათვის, რომ ე.წ. სამხრეთ ოსეთის მოქალაქეებმა რუსეთის მოქალაქეობა ადვილად მიიღონ.

"ჩვენს სახელმწიფო სამინისტროებში არის რამდენიმე სერიოზული შეთანხმება, მათ შორის რუსეთის მოქალაქეობის მიღების გაადვილებასთან და ვადების შეზღუდვის გარეშე რუსეთის ტერიტორიაზე გადაადგილებასთან დაკაშვირებით. სხვა მრავალი შეთანხმებაც არის, რომელიც სამხრეთ ოსეთი რესპუბლიკის სოციალურ-ეკონომიკური განვითარებისკენ იქნება მიმართული", - განაცხადა ბიბილოვმა.