საქართველოს სოფლის მეურნეობის მინისტრი, ლევან დავითაშვილი და საქართველოს კულტურისა და ძეგლთა დაცვის მინისტრი, მიხეილ გიორგაძე ამბობენ, რომ სხვა სამინისტროს შეერთების შემდეგ თანამშრომლების რაოდენობა შემცირდება.

"ბუნებრივია, რომ შემცირება იქნება. ამოცანაც ეს არის რომ მოხდეს ეკონომია. უფრო ეფექტიანი მართვაა და უფრო ნაკლები რესურსებით", - ამბობს დავითაშვილი რუსთავი 2-თან საუბრისას.

მისი თქმით, ის დაქვემდებარებული უწყებები, რომლებიც მანამდე სოფლის მეურნეობის სამინისტროსა და მასთან შეერთებულ გარემოს დაცვის სამინისტროში არსებობდა და უწყების პოლიტიკის შესასრულებლად იყო საჭირო კვლავ შენარჩუნდება.

შესამცირებელი თანამშრომლების კონკრეტულ რიცხვებზე ამ ეტაპზე არ საუბრობს მიხეილ გიორგაძე.

"ბიუჯეტი, რომელიც ადმინისტრაციულ ხარჯებზე იყო გამოყოფილი ერთმნიშვნელოვნად შემცირდება. გარდაუვალია შტატების შემცირება დიდწილად ადმინისტრაციულ ნაწილს შეეხება", - განაცხადა გიორგაძემ.

გუშინ, 13 ნოემბერს, საქართველოს პრემიერ-მინისტრმა, გიორგი კვირიკაშვილმა მთავრობაში დაგეგმილი ცვლილებების შესახებ ისაუბრა. ამ ცვლილებების მიხედვით, ეკონომიკისა და მდგრადი განვითარების სამინისტროს უერთდება ენერგეტიკის სამინისტრო და გარემოს დაცვისა და ბუნებრივი რესურსების სამინისტროს ბუნებრივი რესურსების მართვის კომპონენტი. მინისტრის თანამდებობაზე კი დიმიტრი ქუმსიშვილი ინიშნება.

განათლებისა და მეცნიერების სამინისტროს უერთდება სპორტისა და ახალგაზრდობის საქმეთა სამინისტროს ახალგაზრდობის საქმეთა მართვის კომპონენტი და მინისტრის პოსტს დაიკავებს მიხეილ ჩხენკელი, რომელიც თბილისის სახელმწიფო უნივერსიტეტის პრორექტორია. კულტურისა და ძეგლთა დაცვის სამინისტროს უერთდება სპორტისა და ახალგაზრდობის საქმეთა სამინისტროს სპორტის კომპონენტი და ამ მინისტრის თანამდებობას დაიკავებს მიხეილ გიორგაძე.

გარემოს დაცვის სამინისტროს უერთდება სოფლის მეურნეობის სამინისტრო და გარემოსა დაცვისა და სოფლის მეურნეობის მინისტრის პოსტს ლევან დავითაშვილი დაიკავებს. საგარეო საქმეთა სამინისტროს უერთდება სახელმწიფო მინისტრის აპარატი ევროპულ და ევროატლანტიკურ სტრუქტურებში ინტეგრაციის საკითხებში და მინისტრის პოსტს ვიცე-პრემიერი მიხეილ ჯანელიძე დაიკავებს