თბილისის ახლადარჩეული მერის, კახა კალაძის თქმით, მომავალი კვირის ბოლოდან ახალგაზრდების მიერ თბილისში არსებული მიწისქვეშა გადასასვლელების მოხატვა დაიწყება. ამის შესახებ კალაძემ ფეისბუქში გავრცელებულ ვიდეომიმართვაში განაცხადა. მისი განცხადებით, ამ ინიციატივას ახალგაზრდების მხრიდან დიდი გამოხმაურება მოჰყვა და პროექტის განხორციელება მომავალი პარასკევიდან ან შაბათიდან დაიწყება.

კალაძის თქმით, გმირთა მოედნის მიწისქვეშა გადასასვლელი მორეცხვითი და მდგომარეობის გამოსწორების სამუშაოები დღეს დასრულდა. მანვე განმარტა, რომ ადგილზე ანტივანდალური განათების სისტემები დამონტაჟდა:

"ერთადერთი, რაც გასაკეთებელი რჩება, ანტივანდალური სათვალთვალო კამერებია, რომლის მონტაჟსაც რამდენიმე დღეში დავიწყებთ. აღნიშნული პროცესი სრულად დაახლოებით, ათი დღის განმავლობაში დასრულდება“.

ახლადარჩეული მერის განცხადებით, განსაკურებით კი ღამის საათებში, მორიგეობა გაგრძელდება, რათა მიწისქვეშა გვირაბის ინფრასტრუქტურა არ დაზიანდეს.

რამდენიმე დღის წინ კახა კალაძემ ზოოპარკისა და ცირკის მიმდებარე ტერიტორიაზე არსებული მიწისქვეშა გადასასვლელი დაათვალიერა. მან განაცხადა, რომ მიწისქვეშა გადასასვლელებში არსებული მდგომარეობა კრიტიკას ვერ უძლებს და ძალიან მძიმე ვითარებაა.