თბილისის არჩეულმა მერმა კახა კალაძემ მიწისქვეშა გადასასვლელების მოხატვასთან დაკავშირებით ახალგაზრდებს მიმართა და განაცხადა, რომ ამასთან დაკავშირებით კონკრეტული გეგმის შემუშავებას აპირებს.

კალაძემ დღეს, 7 ნოემბერს, ზოოპარკისა და ცირკის მიმდებარე ტერიტორიაზე არსებული მიწისქვეშა გადასასვლელი დაათვალიერა:

"მომდევნო დღეების განმავლობაში, როდესაც მიწისქვეშა გადასასვლელებზე სრული სურათი გვექნება, ახალგაზრდებს კონკრეტულ ადგილებს შევთავაზებთ, სადაც გვირაბების მოხატვა უნდა განხორციელდეს".

მისივე თქმით, მიწისქვეშა გადასასვლელებში არსებული მდგომარეობა კრიტიკას ვერ უძლებს და ძალიან მძიმე ვითარებაა:

"თბილსერვისის ხელმძღვანელს მინდა ვთხოვო, რომ დღესვე დაიწყოთ სამუშაოების შესრულება - მორეცხვა, ელექტროგაყვანილობა და განათება, რადგან აღარაფერი არსებობს. ყველაფერი, რაც ადრე იყო, დაზიანებულია".

მისივე თქმით, აქვს ინფორმაცია, რომ ქალაქში ზოგიერთი მიწისქვეშა გადასასვლელი გასხვისებული, ან იჯარით არის გაცემული:

"ჩვენ არავის საკუთრებას არ ვეხებით, თუმცა მინდა გთხოვოთ, რომ ერთიანი სტანდარტი იქნეს შემუშავებული და ათი დღის განმავლობაში, სრული სურათი წარმოადგინოთ. ყველა ადამიანმა, მესაკუთრემ თუ ვისაც იჯარით აქვს გაცემული მიწისქვეშა გადასასვლელი, კეთილი უნდა ინებონ და ერთიან სტანდარტში უნდა მოიყვანონ არსებული მდგომარეობა".