გაერთიანებული სამეფო — ესექსის უნივერსიტეტმა საქართველოს წითელი ჯვრის საზოგადოების პრეზიდენტსა და წითელი ჯვრისა და წითელი ნახევარმთვარის საზოგადოებების საერთაშორისო ფედერაციის ვიცე-პრეზიდენტს, ნათია ლოლაძეს, საპატიო დოქტორის წოდება მიანიჭა.

უნივერსიტეტის გადაწყვეტილებით, 2026 წლის გამოსაშვებ ცერემონიებზე ეს მაღალი აკადემიური ჯილდო შვიდ გამორჩეულ პირს გადაეცა. საპატიო დოქტორის წოდება ენიჭებათ მათ, ვინც გამორჩეული წვლილი შეიტანეს როგორც საკუთარ პროფესიულ სფეროში, ისე გლობალური საზოგადოების განვითარებაში.

ნათია ლოლაძისთვის ეს ჯილდო მისი ჰუმანიტარული საქმიანობის, ადამიანური ღისრსების, სოლიდარობისა და სოციალური პასუხისმგებლობისადმი ერთგულების აღიარებაა.

დაჯილდოების ცერემონიაზე სიტყვით გამოსვლისას ნათია ლოლაძემ ხაზი გაუსვა, რომ ესექსის უნივერსიტეტმა მნიშვნელოვანი როლი ითამაშა მისი პროფესიული იდენტობის ფორმირებასა და პიროვნული განვითარების პროცესში.

“ეს ჯილდო არა მხოლოდ ჩემი, არამედ იმ ათასობით მოხალისისა და პროფესიონალის დამსახურებაა, რომლებიც ყოველდღიურად იბრძვიან ადამიანური ღირსების დასაცავად“, — განაცხადა ნათია ლოლაძემ.

სიტყვით გამოსვლისას მან აღნიშნა ახალგაზრდა ლიდერების, განსაკუთრებულად კი ქალების გაძლიერების მნიშვნელობაზე. ნათიას მიაჩნია, რომ უნივერსიტეტმა მას მისცა ცოდნა, თავდაჯერება და მოტივაცია, ემოქმედა ყველაზე რთულ ჰუმანიტარულ გამოწვევებთან გამკლავების პროცესში.

ნათია ლოლაძე საერთაშორისო ასპარეზზე ჰუმანიტარული პრინციპების, ინკლუზიური გადაწყვეტილებებისა და ქალთა გაძლიერების აქტიური მხარდამჭერია. IFRC-ის ვიცე-პრეზიდენტის რანგში ის მონაწილეობას იღებს მსოფლიო მნიშვნელობის კრიზისების მართვაში, რაც მისი, როგორც ლიდერის, საერთაშორისო გავლენას კიდევ უფრო მეტად უსვამს ხაზს.