საქართველოს პარლამენტის თავმჯდომარემ, შალვა პაპუაშვილმა ჩინეთის პარლამენტის თავმჯდომარე ჭაო ლეძი საქართველოში დაპატიჟა. ამის შესახებ თავად პაპუაშილმა ჟურნალისტებთან საუბრისას განაცხადა.

შალვა პაპუაშვილმა იმედი გამოთქვა რომ ვიზიტი მალე განხორციელდება. მისი განმარტებით, ჩინეთის პარლამენტის თავმჯდომარეს საქართველოსა და ქართული კულტურის მიმართ დიდი ინტერესი აქვს.

"მე იმედი მაქვს, რომ მალე შევძლებთ, რომ ეს ვიზიტი განხორციელდეს. რა თქმა უნდა, ჩვენ, გარდა ოფიციალური საუბრის ნაწილისა, ასევე გვქონდა შესაძლებლობა, რომ გვესაუბრა იმაზე თუ რამდენად მნიშვნელოვანია პარლამენტარებს შორის პიროვნული ურთიერთობები და გაცვლა. მოვიწვიეთ დელეგაციები საქართველოში და რაც მთავარია, მოვიწვიე თავად თავმჯდომარე. მისი პირველი რეაქცია მაიმედებს, რომ მალე იქნება შესაძლებელი, რომ ეს ვიზიტი განხორციელდეს. მას დიდი ინტერესი აქვს საქართველოსა და ქართული კულტურის მიმართ. ჩვენ ორი უძველესი ცივილიზაცია ვართ და ამ მხრივ, ვფიქრობ, რომ ეს ურთიერთინტერესი ბუნებრივიც არის", — განაცხადა შალვა პაპუაშვილმა.

შეგახსენებთ, შალვა პაპუაშვილი, ჩინეთის სახალხო რესპუბლიკაში ოფიციალური ვიზიტის ფარგლებში, ჩინეთის პარლამენტის ეროვნული სახალხო კონგრესის მუდმივმოქმედი კომიტეტის თავმჯდომარეს, ჭაო ლეძის შეხვდა.

შეხვედრაზე საუბარი შეეხო ორმხრივი თანამშრომლობის კონკრეტულ სექტორებს, როგორებიცაა ვაჭრობა, ეკონომიკა, ტურიზმი, თანამედროვე ტექნოლოგიები, კულტურა და განათლება. შეხვედრაზე აღინიშნა, რომ თავისუფალი ვაჭრობის რეჟიმის წყალობით, ჩინეთი საქართველოს 4 უმსხვილეს სავაჭრო პარტნიორს შორის ერთ-ერთია.

შალვა პაპუაშვილმა ყურადღება გაამახვილა ჩინურ ინვესტიციებზე და აღნიშნა, რომ ჩინური კომპანიები აქტიურად მონაწილეობენ საქართველოში მიმდინარე ინფრასტრუქტურულ სამშენებლო პროექტებში. ასევე შეფასდა ტურიზმის სექტორიც — პირდაპირი ფრენები მნიშვნელოვნად უწყობს ხელს ტურისტული ნაკადების ზრდასა და ხალხთაშორისი კავშირების განვითარებას.

განსაკუთრებული აქცენტი გაკეთდა საქართველოს სატრანსპორტო-სატრანზიტო პოტენციალზე. საქართველოს პარლამენტის თავმჯდომარემ "შუა დერეფნის" მნიშვნელობაზე ისაუბრა.

"შუა დერეფანი, გეოპოლიტიკური დაძაბულობის ფონზე, ტრადიციული ჩრდილოეთის დერეფნის ყველაზე ეფექტიანი ალტერნატივაა", — განაცხადა შალვა პაპუაშვილმა.