არასამთავრობო ორგანიზაცია "სოციალური სამართლიანობის ცენტრი" ბოლო თვეებში პოლიციელების მხრიდან მოქალაქეებზე ფიზიკური ძალადობის შესახებ გავრცელებულ შემთხვევებს ეხმაურება. ორგანიზაციის შეფასებით, აღნიშნული ფაქტები დაკავებულების მიმართ არაადამიანური მოპყრობის პრაქტიკის ნორმალიზების მკაფიო დადასტურებაა.

როგორც ორგანიზაციაში აცხადებენ, ბოლო პერიოდში გახმაურებული საქმეები აჩვენებს, რომ სამართალდამცავთა მხრიდან ძალადობა და უფლებამოსილების ბოროტად გამოყენება ცალკეული თანამშრომლების ერთეულ გადაცდომებს გასცდა. მათივე თქმით, საპოლიციო ძალადობა სისტემის ყოველდღიურობად იქცა, რასაც სახელმწიფოს პოლიტიკური ნების არარსებობა, ინსტიტუციური კონტროლის სისუსტე, დაუსჯელობის კულტურა და პოლიტიკური გავლენები განაპირობებს. ორგანიზაცია ხაზს უსვამს, რომ ქვეყანაში პოლიტიკური კრიზისისა და დემოკრატიული ინსტიტუტების შესუსტების ფონზე, პოლიცია სულ უფრო მეტად გამოიყენება პოლიტიკური პროცესების სამართავად, ხოლო მედიით გაშუქებული ფაქტები ძალადობის რეალური მასშტაბის მხოლოდ მცირე ნაწილია, რადგან მსხვერპლთა უმეტესობა ანგარიშსწორების შიშით დუმს.

"ბოლო პერიოდში გახმაურებული არაერთი საქმე აჩვენებს, რომ სამართალდამცავთა მხრიდან ძალადობა, არასათანადო მოპყრობა და უფლებამოსილების ბოროტად გამოყენება უკვე დიდი ხანია ცალკეული თანამშრომლების ერთეულ გადაცდომებს გასცდა და საპოლიციო ძალადობა სისტემის ყოველდღიურობის შემადგენელი ნაწილად იქცა, რასაც სახელმწიფოს პოლიტიკური ნების არარსებობა, ინსტიტუციური კონტროლის სისუსტე, დაუსჯელობის კულტურა და პოლიტიკური გავლენები ქმნის.

ბოლო წლებში საქართველოში პოლიტიკური კრიზისის და დე ფაქტო ავტორიტარიზმის ფორმალიზებამ ეს პრობლემა კიდევ უფრო მკაფიოდ წარმოაჩინა. დემოკრატიული ინსტიტუტების შესუსტებამ, მმართველი პარტიის ხელში ძალაუფლების კიდევ უფრო მაღალმა კონსოლიდაციამ, პოლიტიკური პლურალიზმის შეზღუდვამ და ფუნდამენტური უფლებებისა და თავისუფლებების დაცვის სტანდარტების გაუარესებამ მნიშვნელოვნად შეუწყო ხელი პოლიციის პოლიტიკური პროცესების სამართავად გამოყენებას.

მედიით გაშუქებული შემთხვევები, სავარაუდოდ, სამართალდამცავთა მხრიდან ძალადობის რეალური მასშტაბის მხოლოდ მცირე ნაწილია. ძალადობის მსხვერპლთა უმეტესობა, სამართალდამცავი ორგანოების წინააღმდეგ საუბარს შურისძიების, უკანონო დევნის, ახალი ბრალდების წარდგენის, მტკიცებულებების გაყალბების ან სხვა ფორმით ანგარიშსწორების შიშით ერიდება", — წერს "სოციალური სამართლიანობის ცენტრი".

"სოციალური სამართლიანობის ცენტრის" გამოხმაურება სრულად წაიკითხეთ აქ.