აჭარის უმაღლესი საბჭოს თავმჯდომარე, ცოტნე ანანიძე, საინფორმაციო IPN-თან საუბრისას გავრცელებულ ინფორმაციას გამოეხმაურა, რომლის თანახმადაც რუსი ტურისტების მხრიდან, რიგ შემთხვევებში, ადგილობრივების სიტყვიერი და ფიზიკური შეურაცხყოფა ხდება.

ცოტნე ანანიძემ ხაზგასმით აღნიშნა, რომ საქართველო უსაფრთხო ტურისტული ქვეყანაა, სადაც კანონის წინაშე ყველა თანასწორია. მისი განცხადებით, ნებისმიერ ადმინისტრაციულ გადაცდომასა თუ დანაშაულზე შინაგან საქმეთა სამინისტროს შესაბამისი რეაგირება ექნება და კონკრეტული ეროვნების მიხედვით საკითხის სპეციალურად უტრირება ქვეყნის ეკონომიკურ ინტერესებში არ შედის.

"საქართველო, ჩვენი რეგიონი ტურისტული ქვეყანაა და ამავდროულად, ძალიან ბევრ საერთაშორისო რეიტინგებში არის უსაფრთხო ქვეყანა. თუ რაიმე ტიპის კონკრეტული გამოვლინებები იქნება, რაც არის ადმინისტრაციული ტიპის გადაცდომა დანაშაული, შინაგან საქმეთა სამინისტროს რეაგირება ექნება ამაზე, არანაირი დისკრიმინაციული მიდგომა ვინმეს მიმართ არ ყოფილა და ვერ იქნება. ვინც არ უნდა იყოს, საქართველოს მოქალაქე იქნება თუ სხვადასხვა ეროვნების ტურისტი, ცხადია, უნდა დაემორჩილოს კანონს.

გასაგებია, ის პოლიტიკური შეფასებები, რაც სამწუხაროდ, გვესმის. სამწუხაროდ, 2010 წელს, [წინა ხელისუფლება] ლარსზე ეპატიჟებოდა მათ შორის რუს ტურისტებს. არსებობს ძალიან მნიშვნელოვანი ფაქტორი, რომ საბჭოთა კავშირის დანგრევის შემდეგ, ჩვენი ძალიან ბევრი თანამემამულე რუსეთის მოქალაქეა, იმ ადამიანებს შეუშლის ვინმე ხელს? სპეციალურად უტრირება კონკრეტული ეროვნების, ცხადია, საქართველოს ეკონომიკურ ინტერესში არ შედის. ჩვენ ვართ ტურისტული, უსაფრთხო ქვეყანა. შინაგან საქმეთა სამინისტრო გამოცდილი, კვალიფიციური კადრებით უზრუნველყოფს, რომ ტურისტულმა სეზონმა უსაფრთხოდ და ფრთხილად ჩაიაროს (IPN)", — განაცხადა ცოტნე ანანიძემ.