აშშ-ის ვიცეპრეზიდენტმა, ჯეი დი ვენსმა და მისმა მეუღლემ, უშა ვენსმა, კვირას, 19 ივნისს, მათი მეოთხე შვილის დაბადების შესახებ გამოაცხადეს. ეს არის პირველი შემთხვევა ბოლო 150-ზე მეტი წლის განმავლობაში, როდესაც მოქმედ ვიცეპრეზიდენტს შვილი შეეძინა. ინფორმაციას The Guardian ავრცელებს.

ვენსმა შვილის დაბადება სოციალურ ქსელში განცხადებით გამოაცხადა, რომელსაც ხელს ის და მისი მეუღლე აწერენ.

"მოხარულები ვართ გაცნობოთ, რომ დღეს დილით ჩვენი ვაჟი, ალეკ ნილ ვენსი დაიბადა. უშა და პატარა თავს ბედნიერად და ჯანმრთელად გრძნობენ, ჩვენი შვილები კი აღფრთოვანებულები არიან თავიანთ პატარა ძმასთან შეხვედრით," — ნათქვამია განცხადებაში.

ცოლ-ქმარმა მადლობა გადაუხადეს უოლტერ რიდის სახელობის ეროვნული სამხედრო-სამედიცინო ცენტრის პერსონალსა და თეთრი სახლის სამედიცინო გუნდს.

The Guardian წერს, რომ ბოლო შემთხვევა, როდესაც აშშ-ის მოქმედი ვიცეპრეზიდენტი მამა გახდა, 1800-იან წლებში დაფიქსირდა. თეთრი სახლის ისტორიული ასოციაციის თანახმად, სკაილერ კოლფაქსსა და მის მეორე მეუღლეს, ელენ ვეიდ კოლფაქსს, 1870 წელს შეეძინათ ვაჟი, სკაილერ კოლფაქს III, როდესაც კოლფაქსი ვიცეპრეზიდენტის პოსტს იკავებდა. მანამდე ათწლეულებით ადრე, 1829 წელს, ჯონ ს. კალჰუნსა და მის მეუღლეს, ფლორიდ ბონოკალჰუნს, შეეძინათ ვაჟი, უილიამი, როდესაც კალჰუნი ვიცეპრეზიდენტი იყო.