ესპანეთის საფეხბურთო ნაკრებმა ისტორიაში მეორედ მოიპოვა მსოფლიო ჩემპიონის ტიტული. ნიუ-იორკისა და ნიუ-ჯერსის სტადიონზე გამართული ფინალი დამატებით დროში დრამატულად წარიმართა და ესპანელების ტრიუმფით დასრულდა.

ფოტო: REUTERS/Agustin Marcarian

მატჩის ერთადერთი და გადამწყვეტი გოლი 106-ე წუთზე "ბარსელონას" გარემარბმა, ფერან ტორესმა გაიტანა. პედრო პოროს ჩაწოდებული ბურთი ნიკო უილიამსმა საოცარი ძალისხმევით შეინარჩუნა მოედანზე შორეულ ძელთან, რის შემდეგაც შეცვლაზე შემოსულმა ტორესმა ზუსტად დაარტყა ემი მარტინესის კარში.

ესპანეთის ნაკრები თამაშს მთლიანად აკონტროლებდა და მეტოქის კარში 20-ჯერ დაარტყა, არგენტინას მხოლოდ ორი საპასუხო მცდელობა ჰქონდა. არგენტინელებმა კარში დარტყმა 115-ე წუთამდე საერთოდ ვერ მოახერხეს, სანამ ლიონელ მესიმ, ბურთი მიკელ მერინოს თავში არ გაარტყა.

ფოტო: Reuters

ძირითადი 90 წუთის მიწურულს "ჩელსის" ნახევარმცველმა ენცო ფერნანდესმა მეორე ყვითელი ბარათი მიიღო, რამაც არგენტინა დამატებით დროში უმძიმეს მდგომარეობაში ჩააყენა.

ფინალური სასტვენის შემდეგ მოედანზე ჩხუბი ატყდა. არგენტინელმა ნახევარმცველმა, ლეანდრო პარედესმა გავისა და ერიკ გარსიას მიწაზე დანარცხების გამო წითელი ბარათი მიიღო.

მეკარე უნაი სიმონმა ტურნირის 8 მატჩში მეშვიდედ შეინახა კარი მშრალად და "ოქროს ხელთათმანი" დაიმსახურა. ესპანეთმა ჩემპიონატზე მხოლოდ 1 გოლი გაუშვა — ყველაზე ნაკლები მუნდიალების ისტორიაში.

ფინალების ისტორიაში სულ სამჯერ დაფიქსირდა შემთხვევა, როდესაც ერთმა მოთამაშემ 100-ზე მეტი გადაცემა შეასრულა. კვირას ეს ნიშნული ერთბაშად ორმა ესპანელმა გადალახა — როდრიმ (101) და 19 წლის პაუ კუბარსიმ (121), რომელიც ტურნირის საუკეთესო ახალგაზრდა მოთამაშედ დასახელდა.

არგენტინამ სულ 464 პასი შეასრულა ესპანეთის 852-ის წინააღმდეგ. მათი მეკარე, ემილიანო მარტინესი, იძულებული გახდა 11 სეივი შეესრულებინა (რეკორდი ფინალების ისტორიაში).