თსუ-ის სტუდენტმა, ირაკლი კუპრაძემ, რომელიც ბოლო დროს უნივერსიტეტის თვითმმართველობის წინაღმდეგ ბრძოლაშია ჩართული და აქციებში აქტიურ მონაწილეობას იღებს, 8 მარტს თავის Facebook გვერდზე დაწერა, რომ ბათუმში მის ოჯახში პოლიციის თანამშრომლები მივიდნენ და ოჯახს მასზე კითხვები დაუსვეს. კუპრაძე აცხადებს, რომ მასა და ლევან ლორთქიფანიძეს უთვალთვალებენ და ტელეფონითაც უსმენენ:

"რამდენიმე დღის წინ , ბათუმში სადაც ჩემი ოჯახი: დედა, ბებია და პატარა და ცხოვრობს ორჯერ მივიდა ორი უშიშროების/პოლიციის (უფორმოდ იყვნენ) სამსახურის თანამშრომლები, რომლებიც პიკაპის ჯიპით იყვნენ და პირადად მე მომიკითხეს, მოითხოვეს დედაჩემისგან ყველა ტიპის ინფორმაცია ჩემზე და ოჯახის სხვა წევრებზე, ისე რომ არაფერი არ აუხსნიათ რა ხდებოდა... დედაჩემი იმდენად შეშინდა და დაიბნა, რომ სახელი გვარებიც კი ვერ ჰკითხა და ვერც მანქანის ნომერი დაიმახსოვრა, რომ შემდეგ გამომერკვია ყველაფერი. ვისაც შესაძლებლობა გაქვთ ძალიან გთხოვთ ეგებ გამორკვევაში დამეხმაროთ ვინ იყვნენ და რა უნდოდათ".

როგორც შსს-ში On.ge-ის განუცხადეს, კუპრაძის ოჯახში შსს თანამშრომლები არ ყოფილან და გამოძიება აღნიშნულის თაობაზე არ დაწყებულა.

7 მარტს თსუ-ის სტუდენტების აქცია "ყველა სტუდენტი თანასწორია-არა სტუდენტური თვითმმართველობის პრივილეგიებს" გაიმართა. აქციის დაწყების მიზეზად სტუდენტები სტუდენტური თვითმმართველობის მიერ ბაკურიანში ჩატარებულ ტრენინგზე დასასწრებად დახარჯულ 24 600 ლარს ასახელებდნენ. მათი თქმით, პირველად არ ხდება, როდესაც თვითმმართველობა მსგავსი ოდენობის თანხას სხვადასხვა ღონისძიებაზე ხარჯავს.

უნივერსიტეტის ეზოში შეკრებილი სტუდენტები რექტორთან შეხვედრასა და ამ საკითხთან დაკავშირებით დალაპარაკებას მოითხოვდნენ. მათი თქმით, ვლადიმერ პაპავა უკვე დაპირდა სტუდენტების, რომ მსგავსი ფაქტი აღარ განმეორდებოდა, თუმცა მიუხედავად ამისა, მაინც გამოუყო თვითმმართველობას ბაკურიანში წასასვლელი თანხა. რექტორის თქმით კი, თვითმმართველობამ სტუდენტებისთვის გამოყოფილი თანხიდან მხოლოდ 22% დახარჯა.

აღნიშნულის გარდა, სტუდენტები აკადემიურ საბჭოსთან შეხვედრასაც ითხოვდნენ, რადგან მიაჩნიათ, რომ გიორგი გაფრინდაშვილი, რომელიც კანცლერის კანდიდატად არის წარდგენილი, არის უღირსი ადამიანი და მისი ამ თანამდებობაზე წარდგენა დაუშვებელია. მათი თქმით, ის არის ძალადობრივი სისტემის ერთ-ერთი წარმომადგენელი, რომელიც სტუდენტებზე ფიზიკურად ძალადობდა.

თსუ-ის რექტორმა სტუდენტების პროტესტსა და მოთხოვნებს, აკადემიური საბჭოს სხდომის დაუყოვნებლივ დანიშვნით უპასუხა, სადაც სტუდენტებმა მას სთხოვეს, მოუწოდოს გაფრინდაშვილს მოხსნას კანდიდატურა კანცლერის პოსტიდან.

საბოლოოდ, შეხვედრაზე მხარეები შეთანხმდნენ, რომ აკადემიური საბჭო კიდევ ერთხელ განიხილავდა გიორგი გაფრინდაშვილის კანდიდატურას.