ევროკომისიის მიგრაციის და საშინაო საქმეთა გენერალური დირექტორატი ოცნების ხელისუფლების საგარეო საქმეთა მინისტრს, მაკა ბოჭორიშვილს წერილს უგზავნის და სთხოვს ინფორმაციის მიწოდებას ევროკომისიის რეკომენდაციების შესრულების თაობაზე. წერილის ადრესატები არიან ასევე — ოცნების ხელისუფლების შს მინისტრი, გელა გელაძე და ევროკავშირის ელჩი საქართველოში პაველ ჰერჩინსკი.

წერილის მიხედვით, ევროკომისია რეკომენდაციების შესრულებას ვიზების შეჩერების მექანიზმის შემდეგ, მე-8 ანგარიშში შეაფასებს და ამ შეფასების საფუძველზე, რეკომენდაციების შეუსრულებლობის შემთხვევაში, კომისიას შეუძლია ვიზალიბერალიზაციის შეჩერების მექანიზმის გააქტიურება.

წერილის ავტორები მაკა ბოჭორიშვილს ახსენებენ, რომ მისი მთავრობის მხრიდან საპასუხო ქმედებების არარსებობის გამო, 2025 წლის იანვარში, ევროკავშირმა გადაწყვიტა, რომ ევროკავშირსა და საქართველოს შორის სავიზო რეჟიმის გამარტივების შესახებ შეთანხმება ნაწილობრივ შეეჩერებინა და დიპლომატიური და სამსახურებრივი პასპორტების მფლობელებისთვის უვიზო რეჟიმი გაეუქმებინა.

შესაბამისად, მას შემდეგ თორმეტმა წევრმა სახელმწიფომ დააწესა სავიზო მოთხოვნა საქართველოს მიერ გაცემული დიპლომატიური და სამსახურებრივი პასპორტების მფლობელებისთვის.

წერილში ნათქვამია, რომ ელოდებიან ოცნების ხელისუფლებამ კომისიას მიაწოდოს ინფორმაცია გაცემული რეკომენდაციების შესრულების შესახებ და, თუ ეს ჯერ არ გაკეთებულა, მიიღონ შესაბამისი ზომები კომისიის ყველა რეკომენდაციაში წამოჭრილი საკითხების მოსაგვარებლად.

"ვიზალიბერალიზაციის დიალოგის წარმატებით დასრულების შემდეგ, 2017 წლიდან საქართველო შენგენის ზონაში უვიზო მიმოსვლით სარგებლობს. უვიზო მიმოსვლა ევროკავშირსა და საქართველოს შორის ურთიერთობებში მნიშვნელოვანი ეტაპია, რომელიც ხელშესახებ სარგებელს მოუტანს საქართველოს მოქალაქეებს.

2024 წლის 6 დეკემბერს ევროკომისიამ მიიღო ვიზათა შეჩერების მექანიზმის მეშვიდე ანგარიში. კომისიის ანგარიშში ხაზგასმულია საქართველოს მიერ ფუნდამენტური უფლებებისა და თავისუფლებების სერიოზული დარღვევები, მათ შორის დისკრიმინაციის აკრძალვის პრინციპის დარღვევასთან დაკავშირებით, რაც ეწინააღმდეგება შესაბამის ევროპულ და საერთაშორისო სტანდარტებს.

შედეგად, კომისიამ გამოსცა არაერთი რეკომენდაცია. ესენია:

  • ოცნების ხელისუფლებამ გააუქმოს "უცხოური გავლენის გამჭვირვალობის" შესახებ კანონი და "ოჯახური ღირებულებებისა და არასრულწლოვანთა დაცვის" შესახებ საკანონმდებლო პაკეტი და შეცვალოს ადამიანის უფლებების ეროვნული სტრატეგია და სამოქმედო გეგმა, რათა უზრუნველყოს LGBTIQ პირების უფლებების სრულად დაცვა.
  • კონკრეტული რეკომენდაცია ფოკუსირებული იყო ცვლილებაზე "ანტიკორუფციული ბიუროს კანონზე, რათა გათვალისწინებული ყოფილიყო ვენეციის კომისიის ძირითადი რეკომენდაციები, ბიუროს დამოუკიდებლობის, პოლიტიკური ნეიტრალიტეტისა და ფუნქციების მხრივ.
  • შეიმუშაონ ახალი ანტიკორუფციული სტრატეგია და სამოქმედო გეგმა და განსაკუთრებული ყურადღება დაუთმოს კორუფციული საქმეების გამოძიებას, სისხლის სამართლებრივ დევნას და განაჩენების გამოტანას.

წერილის ავტორები იმედს გამოთქვამენ, რომ საქართველოს ხელისუფლება კონსტრუქციულად უპასუხებს და მიიღებს აუცილებელ ზომებს კომისიის რეკომენდაციების სრულად შესასრულებლად.

"კომისია შეაფასებს რეკომენდაციების შესრულებას ვიზების შეჩერების მექანიზმის შემდეგი ანგარიშის კონტექსტში. ამ შეფასების საფუძველზე, რეკომენდაციების შეუსრულებლობის გაგრძელების შემთხვევაში, კომისიას შეუძლია მიიღოს შესაბამისი ზომები ვიზების რეგულაციის მე-8 მუხლის საფუძველზე, კერძოდ, ვიზების შეჩერების მექანიზმის გააქტიურება.

მე იმედი მაქვს თქვენი თანამშრომლობის ამ მნიშვნელოვანი საკითხის მოგვარებაში და კიდევ ერთხელ ვადასტურებ ევროკავშირის მუდმივ ერთგულებას საქართველოსთან ძლიერი და ღირებულებებზე დაფუძნებული ურთიერთობების მიმართ", — წერია წერილში.