"დემოკრატიის ნგრევის კვალდაკვალ, საქართველოს კარი რუსეთის, ჩინეთისა და ირანისთვის იღება", — ამ სახელწოდებით ვრცელ სტატიას CNN აქვეყნებს, სადაც ქვეყანაში ბოლო დროს განვითარებული მოვლენები დეტალურადაა განხილული.

სტატიაში აღწერილია როგორ გახდა კორუფციასთან მებრძოლი, ეკონომიკურად მზარდი, ამერიკელი ინვესტორებისთვის საინტერესო საქართველო — რუსეთის, ჩინეთისა და ირანისთვის "ღია კარი".

საქართველოში მიმდინარე პროცესებში გარდამტეხ მომენტად 2024 წლის ოქტომბრის საპარლამენტო არჩევნებია დასახელებული:

"საქართველოში საპარლამენტო არჩევნები გასული წლის ოქტომბერში გაიმართა, რომელიც საერთაშორისო დამკვირვებლებმა არც თავისუფლად და არც სამართლიანად არ მიიჩნიეს. ოპოზიციამ ბოიკოტის გამოცხადება გადაწყვიტა, რის შედეგადაც, წინააღმდეგობის არქონის პირობებში, ქართული ოცნების დეპუტატებმა ძალით მიიღეს კანონების სერია, რომლებიც დამკვირვებლების შეფასებით დრაკონული, რუსული სტილის კანონებს ჰგავს. ამან მკვეთრი პოლარიზაცია გამოიწვია ქართულ საზოგადოებაში და დაძაბა ურთიერთობები დასავლეთის მთავარ პარტნიორებთან.", — წერია სტატიაში.

CNN-ის ცნობით, ჩინეთისა და ირანის გავლენა საქართველოში იზრდება. ამას მოწმობს ანაკლიის პორტის პროექტის ჩინური კომპანიისთვის გადაცემა და ოცნების პრემიერმინისტრის, ირაკლი კობახიძის ირანის პრეზიდენტ ებრაჰიმ რაისის დაკრძალვაზე დასასწრებად ირანში ჩასვლა.

"ჩინეთის გავლენა საქართველოში მზარდია. გასულ წელს მთავრობამ კონტრაქტი გააუქმა ქართულ, ამერიკულ და ევროპულ კონსორციუმთან, რომელიც ანაკლიის ღრმაწყლოვანი პორტის მშენებლობას შეეხებოდა. ამის ნაცვლად, პროექტი გადაეცა ჩინეთის სახელმწიფოსთან დაკავშირებულ კომპანიებს, რომელთა ნაწილი აშშ-ის სანქციების ქვეშ იმყოფება.

ქართული ოცნება მეგობრებს ირანშიც პოულობს. გასული წლის მაისში, ახლად დანიშნული პრემიერმინისტრი ირაკლი კობახიძე გაფრინდა თეირანში ირანის პრეზიდენტ ებრაჰიმ რაისის დაკრძალვაზე დასასწრებად, სადაც მან ჰამასისა და ჰეზბოლას ლიდერებთან ერთად მიიღო მონაწილეობა საპატიო პროცესში. ივლისში კი კვლავ ეწვია ირანს ახალი პრეზიდენტის ინაუგურაციაზე დასასწრებად", — ვკითხულობთ სტატიაში.

CNN კრემლის წინაშე საქართველოს დაუცველობაზეც აკეთებს აქცენტს და აღნიშნავს, რომ ოცნების მთავრობის გადაწყვეტილება — შეაჩეროს მოლაპარაკებები ევროკავშირთან ქვეყანას კიდევ უფრო მოწყვლადს ხდის.

"მიუხედავად იმისა, რომ მათი მთავრობა სულ უფრო მეტად იხრება რუსეთისკენ, საქართველოს მოსახლეობა დასავლეთთან ინტეგრაციას აბსოლუტურად უჭერს მხარს. საქართველოს კონსტიტუციაში გაწერილია ვალდებულება — უზრუნველყოს ქვეყნის სრულფასოვანი ინტეგრაცია ევროკავშირსა და ნატოში. თუმცა, 2024 წლის ნოემბერში, მიუხედავად იმისა, რომ ქართული ოცნების კონტროლირებადი მთავრობა ირწმუნებოდა, რომ ევროკავშირში გაწევრიანების პროცესს აგრძელებდა, მან თავისი მცდელობები ფორმალურად შეაჩერა. ამ გადაწყვეტილებამ აშშ-ის სახელმწიფო დეპარტამენტის გაფრთხილება გამოიწვია, რომ ეს საქართველოს "კრემლისთვის კიდევ უფრო მოწყვლადს გახდის", — წერია სტატიაში.

სტატიაში ხაზგასმულია "MEGOBARI აქტის" მნიშვნელობა და ქართველების არაერთგვაროვანი დამოკიდებულება მის მიმართ.

"MEGOBARI აქტთან" დაკავშირებით CNN-ის სტატიაში პარტია გახარია — საქართველოსთვის ლიდერის, გიორგი გახარიას კომენტარია მოყვანილი, სადაც ის დოკუმენტისა და პროცესებში დასავლეთის ჩართულობის გაძლიერების მნიშვნელობაზე საუბრობს.

"MEGOBARI აქტი იმედს" იძლევა, რომ დასავლეთის ჩართულობა გაძლიერდება, თუმცა მხოლოდ საერთაშორისო ზეწოლა ვერ შეცვლის საქართველოს დღევანდელ კურსს. რეჟიმი ყველა სანდო ალტერნატივის გაქრობას აგრესიულად ცდილობს, მაგრამ მჯერა, რომ ქართულ საზოგადოებას საკმარისი სიმტკიცე და გამბედაობა გააჩნია, რათა წინააღმდეგობა გაუწიოს და დაიბრუნოს თავისი დამსახურებული ადგილი ევროპაში — იმ შემთხვევაში, თუ მსოფლიო ჩართული და ფხიზელი დარჩება", — თქვა გახარიამ.