პარლამენტის მიმდებარე ტერიტორია, 2019 წლის 20 ივნისის ღამის გამოძიების ფარგლებში კვლავ ყვითელი ლენტით შემოსაზღვრეს.

პარლამენტის მიმდებარე ტერიტორიაზე მაკო გომურიც იმყოფება, რომელსაც ექსპერტ-კრიმინალისტები და გამომძიებლები გაესაუბრნენ. ადგილზე მყოფმა პროკურატურის წარმომადგენელმა ჟურნალისტებთან საუბრისას აღნიშნა, რომ საგამოძიებო ექსპერიმენტის ჩასატარებლად კიდევ ერთ დაზარალებულს ელოდებიან.

"ველოდებით კიდევ ერთ დაზარალებულს, რომლის მონაწილეობითაც საქართველოს პარლამენტის მიმდებარედ ჩატარდება საგამოძიებო ექსპერიმენტი და რა თქმა უნდა, ვიმედოვნებთ რომ ის მეტ დეტალს აღიდგენს. მიუთითებს გამომძიებელსა და ექსპერტ-კრიმინალისტებს ყველა იმ ინფორმაციას, რაც მას გააჩნია და შესაბამისად, აღნიშნული აისახება ოქმში," — თქვა მან.

მისივე თქმით, ფაქტზე გამოძიება 2019 წელსვე დაიწყო, ბევრი პირიც გამოიკითხა და მომავალში თუკი ვინმეს ექნება ობიექტურად მნიშვნელოვანი ინფორმაცია საქმესთან დაკავშირებით, ისიც გამოიკითხება.

"აღნიშნულ ფაქტზე გამოძიება დაიწყო 2019 წელსვე და რა თქმა უნდა, ჩატარებული არის ასობით საგამოძიებო მოქმედება. სისხლის სამართლის საქმე შედგება ასობით ტომისგან და რა თქმა უნდა, ძალიან ბევრი პირი არის გამოკითხული. თუკი ვინმეს შემხებლობა შესაძლოა ჰქონდეს, ობიექტურად მნიშვნელოვანი, სისხლის სამართლის საქმესთან და შესაძლოა ფლობდეს იმ ფაქტთან დაკავშირებით, რაზეც მე გითხარით ინფორმაციას, რა თქმა უნდა არის გამოკითხული და თუ კიდევ ვინმე გამოიკვეთება, რა თქმა უნდა, გამოიკითხება.

შესაბამისი მტკიცებულებითი არსებობის შემთხვევაში, რა თქმა უნდა, მიიღება კანონის შესაბამისი გადაწყვეტილება და პასუხისმგებლობის საკითხიც დადგება კონკრეტული პირის, ვინც გამოიკვეთება გამოძიებით", — თქვა პროკურატურის წარმომადგენელმა.

2019 წლის 20 ივნისის აქციაზე დაშავებულმა მაკო გომურმა, რომელიც პარლამენტთან საგამოძიებო მოქმედებებში მონაწილეობის მიზნით მოვიდა, NEWS.ON.ge-სთან საუბრისას განაცხადა, რომ "სანამ სტრასბურგმა არ მოითხოვა ამ საქმეზე გამოძიების დაწყება, 6 წლის განმავლობაში პროკურატურას გამოძიება არ ჩაუტარებია.

"სტრასბურგის გადაწყვეტილების საფუძველზე დაიწყო ეს გამოძიება და ცოტა სასაცილოა, სანამ სტრასბურგმა არ მოითხოვა, რომ ეს გამოძიებები დაწყებულიყო, 6 წლის განმავლობაში თვითონ არ მოინდომეს დაწყება და ამას პლუს ემთხვევა, რომ როცა გახარიას წინააღმდეგ დაიწყეს გამოძიება, ზუსტად ამ პერიოდს ემთხვევა ეს გამოძიება. კითხვის ნიშნებს აჩენს ფაქტიც. ჯობია, რომ მივიღოთ მონაწილეობა და ისევ ჩვენს წინააღმდეგ არ გამოიყენონ და არ თქვან, რომ თვითონ არ მიიღეს მონაწილეობა გამოძიებაში. აქ რომ ვერ ვიპოვეთ სამართალი, იმიტომ მივადექით სტრასბურგს და დავიწყეთ ჩვენი საქმეების იქ წაღება" — განუცხადა მაკო გომურმა NEWS.On.ge-ს.

ამ დროისთვის, პარლამენტის მიმდებარე ტერიტორიაზე მოძრაობა აღდგენილია.

პროკურატურამ 20 ივნისის, ე.წ. "გავრილოვის ღამის" საქმეზე რუსთაველის გამზირი ერთი კვირის წინაც, 11 ივლისსაც გადაკეტა. პროკურატურის მიერ გავრცელებული განცხადების მიხედვით, საგამოძიებო მოქმედებები სტრასბურგის სასამართლოს გადაწყვეტილების და რეკომენდაციების გათვალისწინებით დაიწყო.