"ვაცხადებთ ცეცხლის შეწყვეტის რეჟიმს 5-6 მაისის ღამეს, 00:00 საათიდან. დარჩენილ დროში სრულიად რეალურია სიჩუმის უზრუნველყოფა," — განაცხადა უკრაინის პრეზიდენტმა, ვოლოდიმირ ზელენსკიმ და აღნიშნა, რომ ოფიციალური მიმართვა რუსეთის მხრიდან საომარი მოქმედებების შეწყვეტის თაობაზე ჯერ არ მიუღია. ამის შესახებ ინფორმაციას პრეზიდენტი სოციალურ ქსელში ავრცელებს.

მისი თქმით, ადამიანური სიცოცხლე გაცილებით ღირებულია, ვიდრე ნებისმიერი საიუბილეო "დღესასწაული". ზელენსკის განმარტებით, აღნიშნული დროიდან უკრაინა იმოქმედებს საპასუხო პრინციპით და მოუწოდებს რუსეთის ხელისუფლებას გადადგას რეალური ნაბიჯები ომის დასასრულებლად.

"დღეის მდგომარეობით, არ არსებობს ოფიციალური მიმართვა უკრაინის მიმართ საომარი მოქმედებების შეწყვეტის ფორმატთან დაკავშირებით, რასაც რუსული სოციალური ქსელები ავრცელებენ. ჩვენ გვჯერა, რომ ადამიანური სიცოცხლე ბევრად უფრო ღირებულია, ვიდრე ნებისმიერი საიუბილეო „დღესასწაული“. ამასთან დაკავშირებით, ვაცხადებთ ცეცხლის შეწყვეტის რეჟიმს 5-6 მაისის ღამეს, 00:00 საათიდან. დარჩენილ დროში სრულიად რეალურია სიჩუმის უზრუნველყოფა. აღნიშნული მომენტიდან ჩვენ ვიმოქმედებთ საპასუხოდ. დროა, რუსეთის ლიდერებმა გადადგან რეალური ნაბიჯები ომის დასასრულებლად, განსაკუთრებით მაშინ, როცა რუსეთის თავდაცვის სამინისტრო მიიჩნევს, რომ მოსკოვში აღლუმის ჩატარება უკრაინის კეთილგანწყობის გარეშე ვერ მოხერხდება," — განაცხადა მან.