ადამიანების უმრავლესობა თავის პოსტებსაც კი აღარ წერს დამოუკიდებლად — ამ დასკვნამდე მივიდნენ მკვლევრები, რომლებმაც ინტერნეტსივრცეში ხელოვნური ინტელექტით (AI) გენერირებული კონტენტის წილი შეისწავლეს. დასკვნა დამაფიქრებელია: კვლევის პერიოდში, 2024 და 2025 წლებში გამოქვეყნებული პოსტების, დაახლოებით, 90% ხელოვნური ინტელექტის დაწერილია.

"ჩვენ შევისწავლეთ 40 ათასი ინგლისურენოვანი პოსტი ლინკდინსა და ფეისბუქზე, და შევადარეთ ამავე ავტორების მიერ წლების წინ გამოქვეყნებულ მასალებს", — წერს მედიისა და ჟურნალისტიკის კვლევითი ცენტრის წარმომადგენელი მარიუს დრაგომირი, — "მოკლედ რომ გითხრათ, ადამიანების უმრავლესობამ საკუთარი პოსტების წერაც კი შეწყვიტა. 2024 წლის ბოლოდან მოყოლებული, 10 პოსტიდან, საშუალოდ, 9 დიდწილად ან მთლიანად AI-ით გენერირებულია.

"უმრავლეს შემთხვევაში, ტექსტი უცვლელადაა ხოლმე გადმოტანილი: ერთნაირი დასაწყისები, ერთნაირი ტონი, გრძელი აბზაცები, რომლებიც კარგად იკითხება, მაგრამ შინაარსს მოკლებულია. მგონი, უკვე ბევრი ვცნობთ ამ ახალ ენას, რომელიც გამართული კი ჩანს, მაგრამ არანაირ ფაქტს ან მსგავსს არ იშველიებს დასამოწმებლად და არც კონკრეტულ დასკვნებს არ აკეთებს. ამ ეტაპისთვის, მას შეგვიძლია ვუწოდოთ სინთეზური დაბალინფორმაციული ენა (SLIL)".

დრაგომირი ასევე მიუთითებს, რომ SLIL-ს უფრო მეტად ლინკდინზე იყენებენ, ვიდრე ფეისბუქზე. ამასთან, ხელოვნური ინტელექტით გენერირებული პოსტები ხშირად გვხვდება იმ სფეროებში, "რომლებიც საზოგადოებრივ ინტერესებს უნდა ემსახურებოდნენ": პოლიტიკა, ჟურნალისტიკა, არასამთავრობო სექტორი. მეტიც, რაც უნდა ირონიული იყოს, AI-ით გენერირებულ კონტენტს იყენებენ ისინიც, ვინც დეზინფორმაციასთან მებრძოლად და მედიაწიგნიერების ქომაგად პოზიციონირდება.

რაც შეეხება გეოგრაფიულ მახასიათებლებს, SLIL-ს აშშ-სა და ბრიტანეთზე მეტად ცენტრალური და აღმოსავლეთ ევროპის ქვეყნებში იყენებენ.

კვლევის დასკვნით თანახმად, რადგან AI-ით გენერირებული პოსტები მეტწილად ადამიანის ჩარევის ან კონტექსტის ახსნის გარეშე ქვეყნდება, ეს მხოლოდ პროცესს კი არ ხდის მეტად ავტომატიზებულს, ტექსტს ძირითად მახასიათებლებსაც აკლებს: "ავტორისეული შეფასება, პერსპექტივა და მასალაზე პასუხისმგებლობაც გენერაციული სისტემების ხელში გადადის".

"რას გვეუბნება ეს ყველაფერი?", — წერს დრაგომირი, — "ბევრ რამეს. პირველ ყოვლისა, იმას, რომ, ჩემი ხედვით, საავტორო საქმიანობა ქრება. თუმცა, ეს ტენდენცია სამომავლოდ საზოგადოებრივი კომუნიკაციის სიჯანსაღეზე სხვაგვარადაც აისახება, ამდენად, იმედი გვაქვს, კვლევას გავაფართოებთ".