Human Rights Watch-მა მსოფლიოს ანგარიში 2026 გამოაქვეყნა, სადაც ნათქვამია, რომ ქართული ოცნების მიერ გატარებული პოლიტიკის შედეგად, ქვეყანაში ადამიანის უფლებების მდგომარეობა მნიშვნელოვნად გაუარესდა. ანგარიშის მიხედვით, ხელისუფლებამ კანონებისა და რეგულაციების პაკეტი მიიღო, რომელიც სამოქალაქო საზოგადოებას, დამოუკიდებელ მედიას და მშვიდობიან პროტესტს ზღუდავს.

ანგარიში მიუთითებს, რომ ხელისუფლების მიერ 2024–2025 წლებში მიღებული საკანონმდებლო ცვლილებები ეწინააღმდეგება საქართველოს საერთაშორისო ვალდებულებებს სიტყვის, შეკრებისა და გაერთიანების თავისუფლების კუთხით.

Human Rights Watch-ის შეფასებით, ერთ-ერთი ყველაზე პრობლემური ნაბიჯი ე.წ. "უცხოელი აგენტების" კანონის მიღება იყო, რომელიც უცხოურ დაფინანსებაზე დამოკიდებულ ორგანიზაციებსა და პირებს ავალდებულებს, დარეგისტრირდნენ სპეციალურ სახელმწიფო რეესტრში. კანონი ასევე ითვალისწინებს დეტალურ ფინანსურ ანგარიშგებას, საჯარო განცხადებების მონიშვნას "უცხოელი აგენტის" სტატუსით და მძიმე სანქციებს, მათ შორის სისხლის სამართლის პასუხისმგებლობას.

ანგარიშში აღნიშნულია, რომ ეს კანონმდებლობა სერიოზულ საფრთხეს უქმნის დამოუკიდებელი არასამთავრობო ორგანიზაციების არსებობას და მათი სტიგმატიზაციას უწყობს ხელს.

ამასთან, გრანტების შესახებ კანონში შეტანილმა ცვლილებებმა უცხოურ დაფინანსებაზე მთავრობის წინასწარი ნებართვა სავალდებულო გახადა, რაც ანგარიშის მიხედვით, კიდევ უფრო ზღუდავს არასამთავრობო სექტორის საქმიანობას.

ანგარიშში ყურადღება გამახვილებულია 2024 წლის ბოლოსა და 2025 წლის განმავლობაში გამართულ მასშტაბურ საპროტესტო აქციებზე, რომლებიც საქართველოს ევროინტეგრაციის პროცესის შეჩერებას მოჰყვა. Human Rights Watch-ის მიხედვით, პოლიციამ და უსაფრთხოების ძალებმა მრავალ შემთხვევაში მშვიდობიანი დემონსტრანტების წინააღმდეგ, გადამეტებული ძალა გამოიყენეს — მათ შორის ცემა, დაკავებები და არასათანადო მოპყრობა.

ანგარიშში ასევე წერია, რომ პოლიციის მიერ ძალის გადამეტების ფაქტებზე ეფექტიანი გამოძიება პრაქტიკულად არ ჩატარებულა და პასუხისმგებელი არ დასჯილან.

Human Rights Watch მედიის თავისუფლების შეზღუდვაზეც საუბრობს. მათი განმარტებით, კანონებში შეტანილმა ცვლილებებმა მაუწყებლებისთვის უცხოური დაფინანსება აკრძალა და მარეგულირებელი ორგანოების უფლებამოსილებები გაზარდა, რაც ხელისუფლების მიმართ კრიტიკულ მედიაზე ზეწოლას ახდენს.

Human Rights Watch-ის ანგარიშში წერია, რომ საქართველოს დემოკრატიული უკუსვლა მკვეთრ რეაქციას იწვევს საერთაშორისო პარტნიორების მხრიდან. ორგანიზაცია აღნიშნავს, რომ ევროკავშირმა არაერთხელ გააფრთხილა საქართველო, რომ ქვეყანაში დემოკრატიისა და ადამიანის უფლებების მდგომარეობა მის ევროინტეგრაციას სერიოზულ საფრთხეს უქმნის.

Human Rights Watch-ის 2026 წლის ანგარიშის მიხედვით, საქართველოში ადამიანის უფლებების გარემო მნიშვნელოვნად გაუარესდა. ორგანიზაცია მოუწოდებს საქართველოს ხელისუფლებას გააუქმოს რეპრესიული კანონები, შეწყვიტოს პოლიტიკური დევნა და უზრუნველყოს ფუნდამენტური თავისუფლებების დაცვა.