ოცნების ხელისუფლების შს მინისტრის მოადგილემ, ალექსანდრე დარახველიძემ ბრიფინგზე განაცხადა, რომ ბოლო 24 საათში თბილისსა და რეგიონებში "დაკავებულია უპრეცედენტო რაოდენობა", 88 ნარკორეალიზატორი დააკავეს.

უწყების განცახდებით, ამოღებულია განსაკუთრებით დიდი ოდენობის ნარკოტიკული და ფსიქოტროპული საშუალებები, ცეცხლსასროლი იარაღები და სავარაუდოდ, ნარკოტიკების უკანონო ვაჭრობით მოპოვებული თანხა.

"სამართალდამცველების მიერ ინტენსიურ რეჟიმში ჩატარებული საგამოძიებო მოქმედებების შედეგად მოპოვებული მტკიცებულებებით, დგინდება, რომ დაკავებული ნარკორეალიზატორები ნარკოტიკულ საშუალებებს მოქალაქეებზე სისტემატურად ყიდდნენ.

პოლიციამ მოსამართლის განჩინების საფუძველზე განხორციელებული ნარკოტიკების საკონტროლო შესყიდვების, ასევე, ბრალდებულების მიერ მითითებული ადგილებიდან, მათი პირადი, ავტომანქანების და საცხოვრებელი სახლების ჩხრეკის შედეგად, განსაკუთრებით დიდი ოდენობით სხვადასხვა სახის ნარკოტიკული საშუალება, მათ შორის "კოკაინი", "ჰეროინი", "ალფა პვპ", "ბუპრენორფინი", "მეთადონი", "მორფინი", "მდმა" და გამომშრალი "მარიხუანა — ნივთმტკიცებად ამოიღო. საგამოძიებო მოქმედებების შედეგად," — განაცხადა დარახველიძემ ბრიფინგზე.

გამოძიება საქართველოს სისხლის სამართლის კოდექსის 236-ე, 260-ე, 260-ე ტერცია, 260-ე კვარტა, 261-ე და 265-ე პრიმა მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.

დარახველიძეს განცხადებით, "ნარკოდანაშაულის წინააღმდეგ ბრძოლის შედეგად, 2025 წლის ბოლო 7 თვის გამავლობაში, ნარკოტიკული დანაშაულისთვის, საქართველოს მასშტაბით, დაკავებული და სისხლის სამართლის პასუხისგებაში მიცემულია 5000-ზე მეტი ადამიანი, მათ შორის 2000-მდე ნარკორეალიზაციაში ჩართული პირი".