გამოცემა "ბათუმელების" ცნობით, "ნეტგაზეთის" და "ბათუმელების" დირექტორისა და თანადამფუძნებლის, მზია ამაღლობელის ადვოკატების მიმართვის შემდეგ, სახალხო დამცველმა მზია ამაღლობელის მიმართ სათანადო მკურნალობის უზრუნველყოფისთვის საქმისწარმოება უკვე დაიწყო.

როგორც სახალხო დამცველის მოადგილემ, ელენე ღუდუშაურმა "ბათუმელებს" უთხრა, მზია ამაღლობელის ჯანმრთელობის მდგომარეობასთან დაკავშირებით შესაბამისი სამედიცინო დოკუმენტაცია უკვე გამოითხოვეს.

"უკვე გამოთხოვილი გვაქვს სამედიცინო დოკუმენტაცია. მოგეხსენებათ, ჩვენ მკურნალობის პროცესში უშუალოდ მონაწილეობას ვერ ვიღებთ, თუმცა სახელმწიფო ვალდებულია, ადეკვატური სამედიცინო მომსახურება გაეწიოს პატიმარს. შესაბამისად, ვნახავთ, დოკუმენტაცია გამოთხოვილია, წარმოდგენილიც არის განცხადებით. ჩვენთან დასაქმებულია ექიმი, ჩვენი ექიმი შეაფასებს ამ დოკუმენტაციას და შემდგომში მოხდება რეაგირება. თუ ჩავთვლით, რომ არაადეკვატური სამედიცინო მომსახურება ეწევა, შესაბამისი წინადადებით მივმართავთ უწყებას და რეკომენდაცია გვექნება, რომ გაეწიოს ადეკვატური სამედიცინო მომსახურება.

გარდა ამისა, ქალბატონი მზიას მონახულებაც იგეგმება ამ დღეებში, ან ამ კვირაში. საჭიროების შემთხვევაში ექიმებსაც გავესაუბრებით, ვინც უშუალოდ პენიტენციურ სისტემაში მას მკურნალობას უწევს", — უთხრა ელენე ღუდუშაურმა, სახალხო დამცველის მოადგილემ.

მისივე განმარტებით, მათ საქმისწარმოების დაწყებამდე გამოითხოვეს მზია ამაღლობელის სამედიცინო დოკუმენტაცია საჯარო განცხადებების მოსმენის შემდეგ, თუმცა ჯერ პენიტენციური სამსახურიდან დოკუმენტაცია არ მიუღიათ.

2025 წლის 24 ნოემბერს საიამ მიმართა შესაბამისი კვლევების და მკურნალობის უზრუნველყოფის მიზნით ოცნების ხელისუფლების იუსტიციის მინისტრს და სახალხო დამცველს. მზია ამაღლობელის მხედველობა სასჯელაღსრულების დაწესებულებაში მოთავსების შემდგომ საგრძნობლად გაუარესდა და საგანგაშო ნიშნულზეა.