ცნობილ ინგლისელ მუსიკოსს, ადელს, სულ მალე ახალ ამპლუაში ვიხილავთ. გრემის არაერთგზის მფლობელი მომღერალი ტომ ფორდის ფილმში სამოთხისადმი ვედრება (Cry to Heaven) ითამაშებს. ამერიკელი მოდის დიზაინერი და რეჟისორი თავადვე იქნება სცენარისტი და პროდიუსერი ფილმისა, რომელიც ენ რაისის ამავე სახელწოდების რომანის ეკრანიზაციას წარმოადგენს.

ნაწარმოებში მოქმედება მე-18 საუკუნის იტალიაში ვითარდება, ამბავს კი ორი მთავარი გმირი ჰყავს — ვენეციელი დიდგვაროვანი და ოპერის კასტრირებული მომღერალი — რომელთა გზები მოულოდნელად გადაიკვეთება. 1982 წელს გამოცემული ეს ისტორიული რომანი ჟანრობრივად განსხვავდება რაისის ყველაზე პოპულარული წიგნების სერიისგან, ვამპირის ქრონიკებისგან.

რაც შეეხება ტომ ფორდის კინოადაპტაციას, ადელის გარდა ფილმში აარონ ტეილორ-ჯონსონს, ნიკოლას ჰოულტს და ჰანტერ შაფერს ვიხილავთ. ფილმის გადაღებები იანვარში დაიწყება, საბოლოო ნამუშევარი კი, სავარაუდოდ, მომავალი წლის შემოდგომაზე გამოვა დიდ ეკრანებზე. როგორც ცნობილია, ფორდი თავადვე აფინანსებს პროექტს, დასრულების შემდეგ კი ფილმს გაყიდის. აღსანიშნავია, რომ ეს მისთვის უკვე მესამე სრულმეტრაჟიანი ნამუშევარი იქნება.

აი, ადელს კი მუსიკალურ კარიერაში პაუზა აქვს აღებული. 21-ე საუკუნის ყველაზე პოპულარულმა ბრიტანელმა ქალმა მუსიკოსმა ამ დროისთვის ბოლო ალბომი ოთხი წლის წინ გამოუშვა, შარშან კი ლას-ვეგასში კონცერტების ორწლიანი სერია უქმეები ადელთან ერთად დაასრულა. მაშინ მომღერალმა თქვა, რომ ახალი ალბომის გამოშვებას არ გეგმავდა და დროებით "სხვა შემოქმედებითი საქმით" დაკავება სურდა.

ადელს პირად ცხოვრებაშიც სასიამოვნო სიახლეები აქვს: მუსიკოსი გასულ წელს დაინიშნა სპორტულ აგენტ რიჩ პოლზე, მერე კი, კონცერტზე გამოსვლისას ნიშნობის ბეჭედიც უჩვენა ფანებს.