დიდმა ბრიტანეთმა იარაღის ემბარგო, რომელიც სომხეთსა და აზერბაიჯანზე მოქმედებდა გააუქმა, რაც ოფიციალურად ორმხრივ ურთიერთობებში პროგრესით და რეგიონის მშვიდობის ხელშეწყობის მცდელობებით ახსნა.

13 ოქტომბერს სახელმწიფოს მინისტრმა სტივენ დაუთიმ განაცხადა, რომ ლონდონის ეს გადაწყვეტილება სომხეთის და აზერბაიჯანთან ორმხრივი ურთიერთობების სტრატეგიულ პარტნიორობამდე აყვანას ისახავს მიზნად, ასევე მათი სუვერენიტეტისა და ტერიტორიული მთლიანობის მხარდაჭერას "ჰიბრიდული საფრთხეების" წინააღმდეგ.

დაუთის თქმით, 1992 წელს ეუთოს მიერ დაწესებული იარაღის ემბარგო მოქმედებდა მთიანი ყარაბაღის ომის მწვავე ფაზისას და მიზნად ისახავდა "ყველა სახის იარაღისა და საბრძოლო მასალის მიწოდების შეჩერებას იმ ძალებისთვის, რომლებიც მთიანი ყარაბაღის რეგიონში საბრძოლო მოქმედებებში იყვნენ ჩართული". მისი თქმით, "ემბარგოს არსებობის საფუძველი ახლა უკვე აღარ არსებობს".

ემბარგო, რომელიც 1992 წლის თებერვალში გამოცხადდა, ფორმალურად ნებაყოფლობითი ხასიათის იყო, თუმცა წევრ სახელმწიფოთა უმეტესობა მაინც იცავდა მას მთელი კონფლიქტის განმავლობაში.

ამ პერიოდში სომხეთი ძირითადად რუსეთიდან იღებდა იარაღს, ხოლო აზერბაიჯანი — რუსეთიდან, თურქეთიდან და ისრაელიდან.

დაუთის განცხადებით, ეს გადაწყვეტილება დიდ ბრიტანეთს საშუალებას მისცემს, განავითაროს უსაფრთხოებისა და თავდაცვის პარტნიორობა როგორც სომხეთთან, ასევე აზერბაიჯანთან, რაც მოიცავს მათ სუვერენიტეტისა და ტერიტორიული მთლიანობის მხარდაჭერას საერთო და ჰიბრიდული საფრთხეების პირობებში — როგორც სახელმწიფო, ისე არარეგულარული აქტორების მხრიდან.

მიუხედავად იმისა, რომ ემბარგო იხსნება, იარაღისა და სამხედრო ტექნიკის ექსპორტისა და ვაჭრობის ნებართვების გაცემის განაცხადები კვლავ ინდივიდუალურად განიხილება, დიდი ბრიტანეთის სტრატეგიული ლიცენზირების კრიტერიუმების შესაბამისად.

"გავაგრძელებთ როგორც რეგიონული, ისე შიდა უსაფრთხოების მდგომარეობის დაკვირვებას სომხეთსა და აზერბაიჯანში," — განაცხადა დაუთიმ და იმედი გამოთქვა, რომ აშშ-ის შუამავლობით მიღწეული შეთანხმებები შესაძლოა კავკასიაში ხანგრძლივ მშვიდობას დაედოს საფუძვლად.

ბრიტანეთის მთავრობამ ასევე დაადასტურა მზადყოფნა, ითანამშრომლოს როგორც სომხეთთან და აზერბაიჯანთან, ასევე აშშ-სა და ევროკავშირთან, რათა ითამაშოს "კონსტრუქციული და პრაქტიკული როლი" რეგიონის სტაბილურობისა და უსაფრთხოების განმტკიცებაში.

აღსანიშნავია, რომ სტივენ დაუთის დელეგაცია აგვისტოში სომხეთს ეწვია, სადაც მხარეები ურთიერთობების სტრატეგიული პარტნიორობის დონემდე გაღრმავებაზე შეთანხმდნენ.სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.