შინაგან საქმეთა სამინისტრო თევდორე მღვდლის ქუჩაზე გაჩენილ ხანძართან დაკავშირებით განცხადებას ავრცელებს. უწყების თქმით, ხანძრის პირველი კერა, სავარაუდოდ, ელექტროსადენებიდან გაჩნდა.

"შინაგან საქმეთა სამინისტროს თანამშრომლების მიერ ჩატარებული გამოძიების პირველადი ინფორმაციით, თბილისში, თევდორე მღვდლის ქუჩაზე მდებარე ვაჭრობისთვის განკუთვნილ ერთ-ერთ შენობა-ნაგებობაში ხანძარი, სავარაუდოდ, ელექტროსადენების გაუმართაობამ გამოიწვია.

აღნიშნული ობიექტის მიმდებარედ განთავსებული ვიდეოსამეთვალყურეო კამერის ჩანაწერების დათვალიერებით ირკვევა, რომ ხანძრის, სავარაუდოდ, პირველი კერა, სწორედ ელექტროსადენებიდან ჩნდება.

მომხდარის ზუსტი მიზეზის დასადგენად, ფაქტზე დაწყებულია გამოძიება სისხლის სამართლის კოდექსის 187-ე მუხლის მე-2 ნაწილის "ა" ქვეპუნქით, რაც ცეცხლის წაკიდებით ნივთის დაზიანებას ან განადგურებას გულისხმობს.

თბილისში, თევდორე მღვდლის ქუჩაზე ხანძრის გაჩენის ფაქტზე შეტყობინება შინაგან საქმეთა სამინისტროს საზოგადოებრივი უსაფრთხოების მართვის ცენტრ 112-ში, დღეს - 26 აგვისტოს, გამთენიისას შემოვიდა," — წერია შსს-ს მიერ გავრცელებულ განცხადებაში.

ცნობისთვის, 26 აგვისტოს, გამთენიისას გავრცელდა ინფორმაცია, რომ სადგურის მოედნის მიმდებარედ, თევდორე მღვდლის ქუჩაზე სამსართულიან ნაგებობაში ხანძარი გაჩნდა. ხანძარს ლიკვიდირება მეხანძრე-მაშველებმა მოახერხეს. შემთხვევის შედეგად არავინ დაშავებულა.