თვითგამოცხადებული აფხაზეთი და სამხრეთ ოსეთი, რუსეთის მიერ მათი დამოუკიდებლობის აღიარების დღეს აღნიშნავენ.

17 წლის წინ, 2008 წლის 26 აგვისტოს, აგვისტოს ომის დასრულების შემდეგ, რუსეთის პრეზიდენტმა დიმიტრი მედვედევმა ხელი მოაწერა განკარგულებებს, რომლებიც აფხაზეთისა და სამხრეთ ოსეთის დამოუკიდებლობას აღიარებდნენ, კერძოდ, "ოსი და აფხაზი ხალხების ნების თავისუფალი გამოხატვის", გაეროს ქარტიისა და "სხვა ფუნდამენტური საერთაშორისო დოკუმენტების" გათვალისწინებით, — წერს "ეხო კავკაზა".

მედვედევმა, რომელიც ამჟამად რუსეთის უშიშროების საბჭოს თავმჯდომარის მოადგილის თანამდებობას იკავებს, მიულოცა აფხაზეთის ლიდერს ბადრა გუნბას და აღნიშნა, რომ „რუსეთის ისტორიულმა არჩევანმა სუვერენიტეტის მხარდაჭერისა და მოძმე ქვეყნის უსაფრთხოების უზრუნველყოფის ხელშეწყობის სასარგებლოდ, რეგიონში მშვიდობასა და სტაბილურობას მყარი საფუძველი ჩაუყარა“.

მედვედევმა ოკუპირებული სამხრეთ ოსეთის პრეზიდენტს, ალან გაგლოევსაც მიულოცა და განაცხადა, რომ რუსული მხარის მიერ 2008 წლის 26 აგვისტოს მიღებულმა გადაწყვეტილებამ "დაადასტურა სამხრეთ ოსეთის ხალხის თავისუფლებისა და დამოუკიდებლობის უფლება და გახდა მათი მშვიდობიანი და აყვავებული მომავლის მშენებლობის საწყისი წერტილი".

საქართველო და ქვეყნის საერთაშორისო პარტნიორები აფხაზეთსა და სამხრეთ ოსეთს რუსეთის ფედერაციის მიერ ოკუპირებულ ტერიტორიებად მიიჩნევენ. მათ დამოუკიდებლობას მხოლოდ რუსეთი, ნიკარაგუა, ვენესუელა, სირია და ნაურუ აღიარებენ. ვანუატუმ და ტუვალუმ აღიარება გააუქმეს. სირიის ახალმა ხელისუფლებამ ასევე მიიღო მოწოდება აღიარების გაუქმების შესახებ, მაგრამ გადაწყვეტილება ჯერ არ არის მიღებული. აფხაზეთისა და სამხრეთ ოსეთის დამოუკიდებლობა აღიარა თვითგამოცხადებულმა დნესტრისპირეთის მოლდავეთის რესპუბლიკამ, ასევე უკვე აღარ არსებობდა მთიანი ყარაბაღის რესპუბლიკა, — წერს "ეხო კავკაზა."