საზოგადოებრივი მაუწყებელი დეტექტიური სერიალის გადასაღებად ტენდერს აცხადებს. მხატვრული სერიალის 12 ეპიზოდის დასამზადებლად სავარაუდო ფასი 531 848 ლარია. წინადადებების მიღება 7 ოქტომბერს დაიწყება.

სერიალის ყველა ეპიზოდის სცენარი საჯაროდაა გამოქვეყნებული და მაყურებელს წინასწარ შეუძლია გაარკვიოს როგორ განვითარდება სიუჟეტი.

"ტენდერს თუ კარგად ჩაგიხედავთ, გამოცხადებულია სერიალის სრულად წარმოებაზე - როგორც ტექნიკურ უზრუნველყოფაზე, ისე თანამშრომლების კუთხით. ადამიანები, ვინც ტენდერში შემოვლენ უნდა იცოდნენ რასთან აქვს შეხება. ამას მგონი კითხვაც არ უნდა", - განუცხადა On.ge-ს საზოგადოებრივი მაუწყებლის წარმოებისა და ტექნიკური უზრუნველყოფის დირექტორმა, თეონა მაზმიშვილმა, რომელიც ამავდროულად სატენდერო კომისიის თავმჯდომარე იყო.

სატენდერო წინადადების მიხედვით, მომწოდებელმა სერიალის გადაღება უნდა დაასრულოს ხელშეკრულების გაფორმებიდან 150 კალენდარულ დღის განმავლობაში. ამავე დოკუმენტის მიხედვით, საზოგადოებრივი მაუწყებელი გამარჯვებულ კომპანიას ავანსად გადაურიცხავს თანხის 30 პროცენტს, დარჩენილ თანხას კი ეტაპობრივად, სამუშაოს შესრულების შემდეგ.