ხვალიდან, 25 სექტემბრიდან ბორჯომის ხეობაში, წაღვერის ტყეში, ხანძრის ჩასაქრობად ხუთი ვერტმფრენი იმუშავებს. ამის შესახებ ინფორმაციას საგანგებო სიტუაციების მართვის სააგენტო ავრცელებს.

ხანძრის ქრობის პროცესში საქართველოს ორი, აზერბაიჯანის ერთი და თურქეთის ორი ვერტმფრენი ჩაერთვება. უწყების ინფორმაციით, ხანძრის ჩაქრობის გეგმა საგანგებო შტაბმა დასახა.

"ამ დროისთვის, ბორჯომის ხეობაში, დაბა წაღვერის მიმდებარედ, მთის ფერდობზე არსებულ ტყის მასივში ცეცხლის ღია კერები არ შეინიშნება. მკვეთრად შემცირებულია დაკვამლიანების დონეც", - აღნიშნავენ უწყებაში.

დაბა წაღვერში ხანძარი ბოლო ერთი თვის განმავლობაში მეორედ გაჩნდა. ბოლოს ხანძარი 22 სექტემბერს გაჩნდა და მეხანძრე-მაშველები მის ჩაქრობას უკვე მესამე დღეა ცდილობენ.