აფხაზური საინფორმაციო სააგენტო Abkhaz Inform დე–ფაქტო რესპუბლიკის საგარეო საქმეთა სამინისტროზე დაყრდნობით წერს, რომ დღეს, 17 ივნისს, რომში აფხაზური კულტურის ცენტრი გაიხსნება.

როგორც აფხაზური სააგენტო წერს, ეს არის "აფხაზური კულტურის პირველი ინსტიტუტი საზღვარგარეთ".

ინტიტუტის პრეზენტაციას დაესწრებიან აფხაზეთის დე–ფაქტო რესპუბლიკის საგარეო საქმეთა მინისტრი ვიაჩესლავ ჩიკირბა, მისი მოადგილე კან ტანია და ამავე სამინისტროს ინფორმაციის განყოფილების უფროსი თენგიზ ტარბა. გარდა ამისა, რომში გაიმართება ასოციაცია "ევროპა–აფხაზეთის" ოფისის ინაუგურაცია.

ანონსის მიხედვით, დე–ფაქტო რესპუბლიკის მიერ ორგანიზებულ ღონისძიებას დაესწრებიან იტალიაში რუსეთის, ნიკარაგუისა და ვენესუელას ელჩები.