ოცნების ნარკოპოლიტიკაში შეტანილი ცვლილებების შესახებ იურისტი გურო იმნაძე საკუთარ სოციალურ ქსელში წერს. მისი თქმით, ქართული სამართალდამცავი სისტემის მუშაობის ლოგიკა ეფუძნება შიშს და მუქარას. "ეს ცვლილებები ნარკოპოლიტიკაზე მეტად, ნარკოპოლიტიკით ხალხის კონტროლზე უფროა. და პრინციპში, სრულებით ჯდება იმ ავტორიტარული კანონშემოქმედების ლოგიკაში, რომელსაც აჩქარებული ტემპებით ატარებს ოცნების პარლამენტი", — წერს იურისტი.

"ოცნების "ნარკოპოლიტიკაზე":

მარიხუანას ამ ოდენობებით შეძენა-შენახვა, რაზეც ახლა საპატიმრო სასჯელები ბრუნდება, აქამდეც ისჯებოდა ადმინისტრაციული, ან სისხლის სამართლის წესით. შესაბამისად, პოლიციას და ფართო გაგებით სახელმწიფოს აქამდეც ჰქონდა მარიხუანას უკანონო გავრცელების წინააღმდეგ საბრძოლველად სამართლებრივი მექანიზმები. მაშ, რატომ გახდა ეს ცვლილებები საჭირო? პასუხი მარტივია:

1) ეს არის იმ სადამსჯელო პოპულიზმის გაგრძელება, რომელსაც ბოლო თვეებში აქტიურად ატარებენ ჩვენი სამოსანი დეპუტატები.

2) ქართული სამართალდამცავი სისტემის მუშაობის ლოგიკა ეფუძნება შიშს და მუქარას.

შესაბამისად, რაც მეტად მძიმეა კონკრეტულ ქმედებაზე პოტენციური სასჯელი, ეს უფრო უადვილებს პოლიციას მუშაობას, უფრო სწორად, პოტენციური მსჯავრდადებულის, მოწმეების თუ სხვა პირების დამუშავებას. ლოგიკურად, მძიმე სასჯელის ერთადერთი ალტერნატივა ისევ საპროცესო შეთანხმება და სახელმწიფო ბიუჯეტში (და შეიძლება რომელიმე მაღალჩინოსანი პროკურორის ჯიბეშიც) გადარიცხული უშველებელი თანხებია.

რაც შეეხება საპროცესო და ოპერატიულ-სამძებრო კანონში შესატან ცვლილებებს, რომლითაც კიდევ უფრო უკონტროლო და უჩინარი ხდება ოპერატიული მუშაკების საქმიანობა. ვერ ვიტყვი, რომ აქამდე არსებული ფორმალური გარე კონტროლის მექანიზმები ამ ხალხს არსებითად უშლიდა ხელს უკანონობის კეთებაში, მაგრამ ეს ცვლილებები კიდევ უფრო დეკლარაციულად და ღიად მიანიშნებს, რომ შეუძლიათ, თამამად შეასრულონ უკანონო მითითებები იარაღის/ნარკოტიკის ჩადებაზე, ფარულ თვალთვალზე, პირადი ცხოვრების დეტალების მოპოვებაზე და ა.შ..

შეჯამებისთვის, ეს ცვლილებები ნარკოპოლიტიკაზე მეტად, ნარკოპოლიტიკით ხალხის კონტროლზე უფროა. და პრინციპში, სრულებით ჯდება იმ ავტორიტარული კანონშემოქმედების ლოგიკაში, რომელსაც აჩქარებული ტემპებით ატარებს ოცნების პარლამენტი," — დაწერა გურო იმნაძემ.

ცნობისთვის, ქართული ოცნების პარლამენტის იურიდიულ საკითხთა კომიტეტმა მარიხუანას და კანაფის შეძენაზე და შენახვაზე კანონს ამკაცრებს. კომიტეტმა ცვლილებებს პირველი მოსმენით დაუჭირა მხარი.

არჩილ გორდულაძეს განმარტებით, "მცენარე კანაფის 10-დან 155 გრამამდე, ნედლი მარიხუანას 10-დან 140 გრამამდე, გამომშრალი მარიხუანას 5-დან 70 გრამამდე შეძენა და შენახვა 6 წლამდე ვადით თავისუფლების აღკვეთას გამოიწვევს".